Насловна

СДСМ бара распуштање на „Алфите“

Социјалдемократите најостро го осудија бруталното убиство на 23-годишното момче од страна на припадник на специјалната полициска единица „Тигри“. За СДСМ е недозволиво најповиканите - премиерот и министерката за внатрешни да молчат за овој грозоморен чин и да се кријат зад контрадикторни изјави на полицискиот портпарол.

Според Гордан Георгиев, потпретседател на опозициската партија, полицаецот Игор Спасов е поранешен член на обезбедувањето на Никола Груевски и еден од кадрите на агенцијата за обезбедување „Лупус“.

Опозициската партија бара полициската единица „Алфи“ веднаш да се распушти бидејќи, како што рече, и „алфите“ и „тигрите“ под раководство на ВМРО-ДПМНЕ ја изгубиле смислата. „Наместо за специјални намени, режимот ги злоупотребува за тепање, рекетирање фирми, забегано однесување по кафулиња, дискотеки и улици, анархија и политичко насилство“, рече Георгиев. Тој побара Груевски веднаш јавно да го осуди убиството и да прогласи ден на жалост.

Георгиев рече дека Груевски никогаш нема да биде премиер на сите граѓани: „Срамно, три дена фрла лопати, сече ленти, се смее пред камерите, а не ни помисли јавно да го осуди грозоморното убиство. Што е уште пострашно, претепувањето на момчето се случило на само неколку метри од местото каде што славеше Груевски“.

Опозиционерите инсистираат премиерот да ја лоцира персоналната одговорност за овој трагичен настан и тоа да и' го соопшти на јавноста. „Многу не интересира дали по ова Груевски повторно ќе ја стави Гордана Јанкулоска да извршува каква било јавна функција? Таа веќе нема никаков морален кредибилитет да извршува каква било јавна функција. Прво, поради тоа што МВР се обиде да го забошоти убиството и второ, поради тоа што граѓаните го плаќаат данокот од бруталната партизација на полицијата во изминатите години“, потенцираше Георгиев.

„Не можеме да разбереме како СДСМ си дозволува да биде толку брутален и толку крволочен. Не можеме да разбереме како врз грбот на трагедијата на едно семејство СДСМ се обидува да заработи политички поени“, реагира ВМРО-ДПМНЕ.

Според портпаролот Александар Бичиклиски, ВМРО-ДПМНЕ била првата политичка партија што најостро реагирала до институциите да го расветлат овој трагичен настан во кој млад човек, член на ВМРО-ДПМНЕ, го загуби животот. (Б.Ј.)