Концерт на Александер Јаковлев во Битола

Како најава на годинешниот 19. Интерфест - Битола фестивал, вечерва во Заводот и музеј во Битола со рецитал ќе настапи Александер Јаковлев, еден од најсјајните репрезенти на модерната Руска пијанистичка школа.

Александер Јаковлев е најавен како виртуоз со феноменални технички, музички, креативни способности, кој со своите 29 години има изградено репутација на сестрана личност - филозоф, композитор, но и уметник кому му е близок театарот, џезот и инженерството. Во Битола ќе изведе ремек-дела од литературата за пијано од Хајдн, Шопен, Равел („Ноќниот Гаспар“) и Стравински („Петрушка“).

Досега тој настапувал во значајните м��зички центри: Берлин, Рим, Москва, Женева, Барселона, Мадрид, Валенсија, Виена, Токио, Салцбург, Санкт Петербург, Неапол, под раководството на реномираните диригенти Коган, Мартинов, Балан, Самале, Јаблонски, Нагано. Настапувал со Берлинскиот симфониски оркестар, Швајцарскиот Романде оркестар, Симфонискиот оркестар на Ростов, Филхармонијата „Михаил Јора“, Римскиот камерен оркестар.

Од 2006-2010 година освоил 37 први и 10 втори награди на интернационални пијано конкурси. (К.Б.)