И ние имаме суперкомпјутер

Првиот македонски суперкомпјутер вчера беше пуштен во употреба во Охрид, а го промовираше министерот за информатичко општество, Иво Ивановски. Станува збор за систем за паралелно процесуирање изработен од студентите и професорите на Универзитетот за информатички науки и технологии „Свети Апостол Павле“ во Охрид, составен од 256 процесорски единици и капацитет на обработка на три илјади милиони пресметки во секунда. „Особено сме задоволни што овој компјутер е изработен токму тука во овој универзитет, за кој очекуваме да стане елитна образовна установа“, истакна Ивановски. Тој појасни дека ресурсите на овој компјутер ќе бидат бесплатно достапни на располагање на сите заинтересирани физички и правни субјекти во земјава.

Благоја Самакоски, ректорот на Универзитетот „Свети Апостол Павле“, рече дека идејата била со евтини делови и компоненти да се создаде моќна сметачка машина, со перформанси резервирани за најсовремени машини. „Нашето основно мото беше концептот да не измислуваме топла вода или тркало, туку да ги правиме оние работи што ги прават и други, но притоа да ги внесуваме нашите креативни способности за развој и иновации“, рече Самакоски. (Д.Р.)