Претходен број

Корисниците на „Кејблтел“ плаќаат високи сметки за слаба понуда

Повеќето поплаки се од оние што немаат алтернативен избор за кабелски оператор

Александар Пешев

Исклучување канали и преводи, прекини во Интернет-сообраќајот, паѓање на целиот кабелски сервис. Ова се само дел од проблемите на кои се жалат некои од корисниците на кабелскиот оператор „Кејблтел“. Тие велат дека навремено ги намируваат солените сметки за кабелски услуги кои пред неколку месеци скокнаа на 450 денари од 350, но не се задоволни од она што го добиваат. Одговорните во „Кејблтел“ објаснуваат дека некои странски програми се целосно преведени, а некои се делумно преведени и тие така ги пуштаат во етер.

Повеќето поплаки се од оние што немаат алтернативен избор за кабелски оператор. Еден од најголемите конкуренти на странскиот оператор е домашниот „Телекабел“, кој се нема проширено во сите населби низ Скопје. Дел од незадоволните тврдат дека се пријавиле за „Макс ТВ“ на „Т-Хоум“, но поради популарноста на понудата мора да почекаат за инсталација.

Станислава М. вели дека на некои странски програми преводите често се исклучени. „По многу обиди успеав да добијам оператор на нивната линија за поддршка на корисници. Најкултурно прашав зошто нема превод на неколку странски канали каде што претходно имаше. Добив отсечен одговор да напишам писмено барање до менаџментот на операторот. Не плаќам сметки за кабелска за да пополнувам писмени барања“, вели Станислава.

Од кабелскиот оператор велат дека странските програми се реемитуваат без никакви измени. Имено, како што програмата оди на сателит, така се реемитува.

Од доаѓањето на македонскиот пазар, „Кејблтел“ одлучи да се придржува на законските прописи, исклучувајќи ги сите српски и хрватски преводи од странските канали. Конкуренцијата не го следеше примерот на странскиот оператор, а корисниците, навикнати на преводи, отворено го изразуваа незадоволството. По извесно време „Кејблтел“ се премисли и ги врати преводите на странските канали.

„Некои странски програми се целосно преведени и ги реемитуваме. Некои, пак, од сателит доаѓаат како делумно преведени и така се реемитуваат“, објаснува Лидија Голубова, директорка за маркетинг и продажба во „Кејблтел“.

Некои корисници се жалат дека не можат воопшто да добијат информации од која било линија за корисници што се прикажуваат на информативниот канал на операторот.

Николина М. вели дека на инфолиниите како да нема оператори.

„Во неделата немаше пренос на ТВ Нова од 15 часот до 23 часот. Сакав да се јавам за да се информирам зошто тогаш, кога најмногу се гледа телевизија, го нема мојот омилен канал. Но, не успеав да добијам ниту еден од фиксните и мобилните телефони на операторот“, се жали Николина. Таа тврди дека телефоните се редовно зафатени или никој не се јавува. „Редовно плаќаме и не заслужуваме таков однос“, додава таа.

Од „Кејблтел“ повикуваат на трпение.

„Дури и кога сите оператори се зафатени, корисникот добива сигнал за слободна линија, но мора да почека или да се јави повторно. Се сомневам дека ниту еден оператор не се јавува на линијата за поддршка“, вели Голубова. „Што се однесува до ТВ Нова, мора да го исклучуваме каналот за време на ’Операција триумф‘, бидејќи таков ни е договорот со ТВ-станицата“, објаснува директорката за маркетинг и продажба на „Кејблтел“.