Насловна

Стамболиски: Место орден, ми ставија лисици!

Генералот со часови ја даваше својата одбрана
во судот за случајот со тенковските делови

„Хашките случаи со години се држат во Обвинителството, а нас, кои бевме на браникот на татковината, ни судите по измислено и политичко обвинение што е незамисливо за една правна држава. И наместо да добијам орден од претседателот на државата, тие ме водат како м��јмун со лисици на рацете“, изјави вчера револтирано генералот Методи Стамболиски, како второобвинет во случајот „тенковски делови“. Тој со часови ја даваше својата одбрана пред судот. Стамболиски пред Судскиот совет зборуваше за таен состанок на кој освен активните генерали, биле присутни и пензионирани од рангот на Миле Манолев, Панде Петров, Драгољуб Боцинов и други.

„Се сеќавам дека на тој состанок, на кој се говореше за безбедносната состојба во државата, генералот Митре Арсовски кажа дека не треба да бидеме загрижени за состојбите, бидејќи на границата со Бугарија имало две нивни дивизии. За мене ова беше нелогично, бидејќи не можете да очекувате некој друг да ве одбрани доколку самите не се одбраните, а, патем и не верував, што се покажа како точно, дека такви дивизии имало зад границата“, рече поранешниот началник на Генералштабот на АРМ.

Сведочејќи за настаните од 2001 и следната година кога бил потпишан договорот со МЗТ за набавка на резервни тенковски делови, генералот потврди дека Армијата во тоа време ги немала најелементарните работи за да може да функционира како вистинска војска.

„Некаде во мај 2001 година беше формирана Влада на широка коалиција, а набргу потоа, со одлука на Владата, во Министерството за финансии беше отворена посебна сметка за потребите на војската, а се користеа резервите од продажбата на „Телеком“. Се купуваа оружје, муниција, панцирни елеци, санитетски материјал, авионите ’сухој’, системот ГРАД, тенкови, оклопни транспортери, системите ’стрела‘ и други работи“, изјави генералот Методи Стамболиски.

Тој кажа дека никогаш немал видено какво и да е барање за набавка на хеликоптерите и за авионите, а за нив никогаш не бил изготвен и реферат со кој се потврдува дека постои потреба за набавка. Стамболиски изјави дека безбедносните проблеми се пренеле и на следната 2002 година и дека за ваквото тврдење тој има многу докази, кои или се од безбедносен или од дипломатски карактер. (Љ.С.)