И Бугарија и Романија ги дискредитирале Ромите

Хелсинки - Двајца пратеници од финскиот парламент поднеле жалба во Европската комисија во врска со лошиот однос спрема Ромите во Бугарија и Романија, пишува денеска весникот „Хелсингин саномат“.

Социјалдемократот Јакоб Содерман и членот на Националната коалициска партија Еро Аканен-Пентилја тврдат дека во однос на своите Роми владите во Софија и во Букурешт ги нарушуваат основните принципи на ЕУ, кои забрануваат секаква дискриминација по пол, раса и етничко потекло.

„Се смета дека дискриминацијата на Ромите во Бугарија и во Романија е една од причините голем број од нив да мигрираат во други земји, вклучувајќи и во Финска“, пишува весникот. Според пратеникот Содерман, Европската комисија треба да им покаже на земјите-членки дека треба да се почитуваат законите. Од 1995 до 2003 година, Јакоб Содерман бил омбудсман на ЕУ, додава „Хелсингин саномат“.

ЕК добива голем број жалби, но според Содерман, тоа не ја намалува вредноста на иницијативата на двајцата пратеници, кои финското издание ги нарекува „стари, мудри и лесно гневни мажи“.

„Хелсингин саномат“ истакнува дека Европската комисија врши притисок врз Франција поради прогонот на Роми, но, според Содерман, Комисијата е единствениот орган што може да ги натера Романија и Бугарија да го решат ромското прашање. (МИА)