Треневски бил пионер на македонското евроинтегрирање

Тамара Грнчароска

Германскиот европратеник и лобистот за Македонија, Бернд Поселт, вчера го бранеше Мартин Треневски како одличен избор на земјава за амбасадор. Поселт, кој е член на Паневропската унија, на која во Македонија претседател со години беше токму Треневски, вчера запрашан како ќе ја коментира спорната теза на нашиот иден амбасадор НАТО, го нарече Треневски „пионер на евроинтегрирањето во Македонија“. Поселт, притоа, ја изнесе информацијата дека во 1994 -1995 година, на негова покана, Треневски, заедно со претседателот Борис Трајковски и уште некои други, ја предводел првата македонска делегација во Европскиот парламент и преговарале за тоа Македонија да биде интегрирана во ЕУ. „Тие не беа парламентарци, тие беа во приватна посета, но беа Европејци и патриоти“, рече Поселт.

Поселт, кој деновиве престојува во посета на Македонија, ја нападна опозицијата, велејќи дека може да критикува, но дека не смее да оди во Стразбур и во Брисел за „да ја уценува сопствената влада“. Европратеникот, кој обвини дека некој од опозицијата ја „кодоши“ Владата пред ЕУ, сепак, одби прецизно да каже кој го прави тоа, одговарајќи: „Вие ги знаете“. Поселт, притоа, испрати порака до политичките партии во земјава дека „неопходно е да не се мешаат внатрешните дискусии со европските политики и прашања и дека мора да се создаде некаков вид консензус“.

„Тие можат да дискутираат за внатрешн�� прашања на земјата, но не и за европските интеграции“, смета Поселт. Тој се надева дека најдоцна до унгарското претседавање со ЕУ идната година, Македонија ќе го добие датумот за старт на преговорите. Поселт ги отфрли тврдењата дека ЕУ ја толерира грчката блокада, велејќи дека проблемот е во институциите, и тоа во Советот на ЕУ.

„Грците ја злоупотребуваат положбата во Советот за да го блокираат. Станува збор за злоупотреба на ветото од Грција. Не се работи за толеранција, бидејќи за нас е неприфатливо тоа што го прави Грција, но проблемот е институционален“, вели Поселт. Тој очекува и годинава да се повтори позитивниот извештај на ЕК за Македонија и дека Советот ќе реши да даде датум за преговори. „Планираме за есен во ЕП да иницираме дебата за тоа кога Советот планира да ги започне преговорите“, најави германскиот европратеник.