Вода ќе имаме сигурно уште 30 години, ама да не ја расфрламе
Водата како ресурс за задоволување на елементарните потреби, пиење, наводнување, индустрија, ја има се' помалку, поради што уште отсега треба да се размислува за нејзино ефикасно менаџирање, но и за нејзина заштита од загадување. Токму затоа земјите од регионот треба да реализираат заеднички проекти за рационално искористување на водите и сериозно да се позанимаваат со климатските промени како глобален проблем, се пораките од вчерашната регионална конференција за води на која, покрај македонскиот министер за земјоделство Ацо Спасеноски, учествуваа и министерот за животна средина и шумарство на Турција, Вејсел Ероглу, како и албанскиот министер за животна средина, шумарство и водостопанство Луфтер Хувели.
„Се' уште мислиме дека климатските промени се далеку од нас и не сфаќаме дека треба да се справиме со нив“, рече албанскиот министер Хувели. Тој сугерираше Македонија и Албанија да се заложат за заедничко администрирање на Охридското и Преспанското Езеро, како и на реката Дрим.
Според Спасеноски, Македонија и регионот следните 30 години нема да имаат проблем со обезбедувањето квалитетна вода, но мора да се води сметка, посебно за заштита на Охридското Езеро, кое е најголем природен басен за пивка вода во Европа. (А.С.) |
