Ограбувачот на казиното „оперирал“ и во бензиски пумпи

Охриѓанецот што го ограби казино-клубот „Сенатор“ е во притвор

Охриѓанецот А.Д. (30), кој по извршено разбојништво во казино-клубот „Сенатор“ во Скопје беше уапсен од полицијата, од завчера е на издржување на мерката притвор што му беше изречена за две кривични дела. Тој се товари за разбојништво и за неовластено поседување огнено оружје.

Настанот за кој А.Д. ќе треба кривично да одговара се случи во вторникот наутро кога тој го ограбил казино-клубот „Сенатор“, лоциран на булеварот „Партизански одреди“, но, како што сега стојат работите, полицијата работи на документирање на уште две други разбојништва, што се случија во јануари и март оваа година.

Полициските „алфи“ го привеле охриѓанец само кратко по неговото напуштање на казиното каде, околу 4 часот, влегол вооружен со пиштол. Осомничениот им се заканил на вработените, а откако зел 120.480 денари, во различни апоени, го напуштил локалот. По пријавувањето на настанот А.Д. бил лоциран на улицата „Љубљанска“, каде што и бил фатен. Украдените пари полицијата ги нашла кај него, а му бил одземен и пиштолот „берета“ со четири куршуми.

Полициската истрага, подоцна, открила дека приведениот стои зад грабежот на бензинската пумпа на „Макпетрол“, на улицата „Илинденска“. На 1 јануари оваа година, во 1 часот, тој ја ограбил бензинската пумпа. Маскиран со црна капа на главата и со отвори за очите, ограбувачот бил вооружен, а под закана животите на вработените, со себе однел 191.354 денари. На истата бензинска пумпа, според МВР, тој се вратил и на 11 март, а во идентично изведеното разбојништво одзел близу 128.000 денари.

Од МВР потврдуваат дека осомничениот минува низ полициската крим- евиденција како сторител на слични кривични дела за кои и бил осудуван на повеќегодишни затворски казни. (Љ.С.)