Двојните функционери во партиска редица за оставки?

Не е позната точната бројка, но се сеќавам дека во групи си поднесуваа оставки, тврди Илија Димовски од ВМРО-ДПМНЕ

Светлана Унковска

На две недели пред истекот на рокот за откажување од двојните функции, што им го постави највисокото партиско тело на ВМРО-ДПМНЕ, се' уште не се знае колку од функционерите и од кои фотелји се откажале. Од владејачката партија на Никола Груевски велат дека немаат прецизни податоци за тоа колкав е бројот на оние што се откажале од двојните функциите, но само знаат дека повеќето од нив веќе имаат поднесено оставки.

„Не е позната точната бројка, но се сеќ��вам дека во групи си поднесуваа оставки. Секако, очекувам дека до крајот на месецот ќе се заврши целиот процес“, кусо ни одговори Илија Димовски, директор на Центарот за комуникации на ВМРО-ДПМНЕ. Од коалицискиот партнер, ДУИ, се чини дека овој проблем го немаат, затоа што, како што ни изјави портпаролката на партијата, Ермира Мехмети, во нивните редови нема функционери кои седат на две столчиња.

Досега неколкумина функционери на владејачката ВМРО-ДПМНЕ јавно се изјаснија дека ќе го почитуваат тоа што им го наложила партијата, иако претходно се оглушија на повикот на претседателот на Антикорупциската комисија, Илми Селами, да не го кршат законот со преземањето неколку функции одеднаш. Антикорупционерите, по враќањето од колективниот годишен одмор, ќе треба сериозно да се зафатат со овој проблем. Бидејќи со отворањето на прашањето околу двојните функции се отвори и дилемата во кои случаи и за кои функции може да се каже дека има судир на интереси. Како уште поголемо се наметнува и прашањето што во ниту еден закон не се предвидени санкции против ваквите појави на двојност на функциите.

Антикорупциската комисија, која, од една страна, е надлежна да го реши овој проблем, од друга страна, нема никакви законски мерки со кои би се казниле оние што не сакаат да го почитуваат законот. На првиот антикорупционер му останува само јавно со име и со презиме да го опомене функционерот, но натаму нема никакви овластувања, ниту да казнува ниту да изрече некаква забрана. Останува потоа или партијата, како што сега го направи тоа ВМРО-ДПМНЕ, или општинскиот совет да му наложи да се откаже од некоја од функциите.

Неодамнешните тврдења дека проблемот со двојните функции е поради колизијата на одредбите во неколку закони кои го уредуваат ова прашање, како што е Законот за спречување на корупцијата, за судир на надлежности, за локална самоуправа, како и на Изборниот законик, ги отфрла професорката по управно право Ана Павловска - Данева.

„Според мене, нема колизија на закони, бидејќи во сите нив од различни агли се уредува истата работа и во нив категорично се забранува еден функционер да има две јавни функции. Сега се поставува како проблем тоа што една иста материја се уредува со неколку закони и затоа мислам дека тоа треба да се систематизира и сето тоа да го одредува еден закон. Според тежината на законот, мислам дека тоа треба да биде уредено со Изборниот законик“, вели професорката Данева.

Иако од владејачката ВМРО-ДПМНЕ се' уште јавно не обелоденуваат кои од нивните функционери ќе се откажат од дополнителната фотелја, сепак, оние што ја испочитуваа досега наредбата на матичната партија одбраа да ја напуштат советничката, но ниту еден од нив не стана од директорската фотелја. Август ќе биде последниот хонорар на функционерите од долгата листа на лица со конфликт на интереси.

Засега, од местото претседател на Советот на Општина Центар најави дека се откажува директорот на МЕПСО, Владимир Здравев. Директорот на Градска болница, Виктор Камиловски, треба да замине од првата фотелја во Советот на Општина Аеродром, како и директорот на Претпријатието за стопанисување со станбен и деловен простор, Владимир Бахчовановски, кој грчевито се држи за советничката функција во Центар. Неодамна, само од двојните функции се повлекоа неколку прилепски советници.