Поглед

Обама аџамија

Димитар Чулев

Ја помирува ли Обама Америка со муслиманскиот свет? Или испадна аџамија (неискусен) за верските прашања во секуларна Америка?

Освежувачкиот ветер што го донесе новиот шеф на Белата Куќа со неговите ветувања и најави за п��влекување од Ирак и Авганистан, кој во речникот малку ја користи фразата „борба против тероризмот“ воведена од неговиот претходник, се заканува да се претвори во домашно политичко торнадо: Обама, најтипичен репрезент на мултикултурна, мултиконфесионална и расно измиксана Америка, им прошара по нервите на добар дел од конзервативците (и не само ним) со ноншалантно дадената согласност да се гради муслиманска џамија во близина на урнатите кули-близначки на Светскиот трговски центар и тоа токму од – исламски фундаменталисти.

Ваквиот изблик на толеранција, американската јавност не го сфати, туку го оцени потегот како непочитување на жртвите на терористичките напади во Њујорк од 9 септември. Опозициските Републиканци во лапсусот на Обама видоа одлична можност да го проблематизираат моралниот лик на претседателот, кого и така го обвинуваат за млитаво менаџирање на војните во Ирак и во Авганистан. Доколку успеат да го етикетираат како исламофил, есенските избори за Демократите се отсега изгубени, а Обама ќе владее со се' помал кредибилитет во втората половина од мандатот.

Услови за тоа има. Иако е христијанин, дури 32 отсто од Американците веруваат дека е муслиман, меѓу Републиканците 57 проценти сметаат дека има исламска вероисповест. Ако на ова се додадат и податоците дека 68 отсто анкетирани Американци се против изградба на муслимански објект вреден сто милиони со вградена џамија на Менхетен, станува јасно дека Обама – ја утнал.