Насловна

Тетовски советник ја бојкотира работата четири месеци

Додека не се решат приоритетните проблеми, Драган Давидовски вели дека нема да се врати во советничката клупа

ТЕТОВО – Единствениот член на Советот на Општина Тетово од редовите на ВМРО-НП, Драган Давидовски, веќе четврти месец ја бојкотира работата на највисокиот орган на Општината. Давидовски не гледа ниту поставување, а не почеток на решавање на неколку проблеми што се од интерес за граѓаните. Бидејќи за овој период нема ништо сторено, тој смета дека не се создадени услови за враќање во советничките клупи.

Драган Давидовски како приоритетни ги смета решавањето на проблемот со старите и со новите православни гробишта, почеток на реализација на иницијативата за градба на нова црква во рамничарскиот дел на Тетово, отстранување на дивата депонија од градот, враќање на бистите на двајцата народни херои на плоштадот, решавање на прашањето со недостиг од вода за пиење и уште неколку други за кои повеќепати барал да се постават на дневен ред, но секогаш добивал одговор што не соодветствувал на поставеното прашање.

„Сите прашања се од интерес на граѓаните на Тетово. Избирани сме за членови на највисокиот орган во општината да ги поставуваме, да расправаме и да бараме разрешница. Досега не гледам дека некои од моите барања нашле место во работата на Советот. Се' додека не видам желба и волја да се решат, ќе ја бојкотирам работата на Советот по цена и на поголеми последици“, категоричен е Давидовски. За некои од прашањата, особено оние за гробиштата и градба на црква, очекувал поддршка и од другите советници на партиите на Македонците. Но, како што вели тој, досега не ја добил.

Давидовски бара старите православни гробишта да се прошират и да се создадат услови за достоинствен погреб на починатите. За новите гробишта во селото Фалише, Давидовски смета дека се' уште се поголем срам зашто просторот повеќе личи на депонија.Тој негодува и за упорното опстојување на дивата депонија во градот, која претставува постојана закана за здравјето на луѓето.

„Во Тетово се воведуваат редукции во снабдувањето со вода за пиење, а Шара блика од вода и од извори. Цела година се приградува, но никако проблемот целосно да се реши. Зарем и овој проблем не го заслужува вниманието на нас советниците“, прашува Давидовски, кој продолжува со бојкотот. (Г.Е.)