Груевски подели новогодишни пакетчиња во Домот „11 Октомври“
Премиерот Никола Груевски, министерката за внатрешни работи, Гордана Јанкуловска, и министерот за животна средина, Неџати Јакупи, вчера ги посетија децата од Домот „11 Октомври“ во Скопје. Премиерот Груевски по повод претстојните новогодишни и божикни празници на стотина штитеници од три до дванаесетгодишна возраст им подели пакетчиња со облека, а тие го почестија со приредба.
Во текот на вчерашниот ден, премиерот Груевски и членови на Владата, министри, заменици и државни секретари се упатија во посета на јавните установи, кои се во рамките на Министерството за труд и социјална политика и на штитениците им донира подароци од запленети и преотстапени производи од Царинската управа.
На новинарско прашање дали ваквите посети се договорени на ниво на Влада, премиерот рече: „Во пресрет на Денот на солидарноста - 20 Декември сакавме да посетиме повеќе институции“.
Владини посети вчера имаа и Јавната установа за згрижување, воспитување и образование на деца „Ранка Милановиќ“, Заводот за рехабилитација на деца и младинци во Топанско Поле, Центарот за социјални работи на Град Скопје, Јавната установа за згрижување деца со воспитно-социјални проблеми „25 Мај“, Прифатниот центар за баратели на азил во скопското село Визбегово, потоа Специјалниот завод во Демир Капија, Домот за доенчиња и мали деца - Битола и Заводот за заштита на деца и младинци Бања Банско. (Сн.К.) |
