Исчезнаа 300 мажи во Бенгалскиот Залив
ПОРТ БЛЕР - Индиските власти вчера соопштија дека се' уште се надеваат дека ќе пронајдат преживеани меѓу околу 300 мажи, главно од Бангладеш, кои исчезнаа во близина на оддалечените острови во Бенгалскиот Залив, иако морнарицата соопшти дека пронајде уште две тела. Два индиски воени брода им се приклучија на крајбрежните служби во потрагата по исчезнатите, за многумина од нив се стравува дека се удавиле, изјавија официјалните лица. „Ги пребаруваме сите возможни места во близина на јужниот дел од Мали Андамани, каде што сметаме дека би можеле да најдеме преживеани“, изјави портпаролот на одбраната, Ману Вирк, за Ројтерс во Порт Блер, главен град на Андамани и Никобари. „Ќе ја продолжиме нашата операција за пронаоѓање и спасување на сите острови“, рече тој.
Преживеаните открија дека допливале до брегот откако со недели пловеле во мал брод со малку храна или вода и едно едро. „Преживеаните наведоа дека доцна во ноќта забележале светилник и на тој начин успеале да дојдат до брегот“, рече Ашок Чанд, висок полициски офицер во Порт Блер. „Речиси 300 лица скокнаа во морето, еден по еден, што најверојатно е и причина за смртта“, рече тој. Властите во Порт Блер соопштија дека лицата биле главно од Бангладеш, а некои од Мјанмар, и биле на возраст од 18 до 60 години.
Упатувајќи се кон Малезија, пред 45 дена, каде што им биле ветени работни места, качени на шест брода, мигрантите по кратко време се загубиле и пловеле низ Бенгалскиот Залив. Официјални претставници на крајбрежната служба изјавија дека во неделата 88 лица од група од 412 лица се спасени од бродот пронајден во близина на островот Мали Андамани, околу 90 км јужно од Порт Блер. Вчера тие излегоа со бројка од 102 преживеани. Во неделата беа пронајдени уште две тела, со што бројката се искачи на седуммина пронајдени откако бродот беше забележан во четвртокот. Преживеаните пред властите изјавија дека уште седуммина други починале на море и нивните тела биле фрлени во водата.
Индиската крајбрежна стража истражува како лицата пристигнале во индиските води и како преживеаните се нашле на еден брод. Оддалечена група од повеќе од 500 главно ненаселени острови, Андамани и Никобари се протегаат на околу 1.200 километри во близина на источното индиско крајбрежје, близу до Мјанмар. (Ројтерс) |
