Поглед

Не е се' во парите

Билјана Ангеловска

„Чекори на свое тло“, е мотото на најновата кампања на власта за откуп на дворовите по цена од едно евро за квадрат. „Гази по своите пари“ би бил слободниот превод на кампањата. Бидејќи, за жал, уште еднаш ќе бидат потрошени пари на граѓаните за нешто што е веќе познато, оти продажбата веќе е во тек. Зошто државата реши да спроведе кампања дури една година откако ја намали цената на квадратот градежно земјиште?

Кампањата чини 250.000 евра. Пресметано во земја тоа се 250.000 квадратни метри земјиште. Од Министерството за финансии сметаат дека парите нема да биле бадијала потрошени, бидејќи со кампањата ќе се зголемел процентот на откупени дворови. Колку реално ќе се зголеми тој процент, останува да се види. Поднесените 20.000 барања за откуп по минимална цена и не се толку многу со оглед на вкупниот број субјекти што имаат законска обврска да ги купат дворните површини. Оти тука спаѓаат не само дворовите на станбените куќи туку и на колективните згради, но и земјиштето на кое се изградени сите стопански и нестопански објекти.

Очигледно, на надлежните не им текна наместо да спроведуваат кампања, да ја поедностават процедурата. Досега веќе требаше да сфатат дека не е цената главниот фактор за малиот одѕив кај граѓаните. Компликуваната процедура е тоа што ги одвраќа луѓето да го започнат процесот. Сосема друго прашање е подготвеноста на институциите да одговорат на барањата на граѓаните.

На државата требаше да и' стане јасно дека најдобро ќе беше да ги вложи парите најпрвин за да ја заврши започнатата денационализација, а потоа да ги продава дворовите. Вака, и за џабе да го нуди земјиштето, тешко ќе го даде. Сепак, не е се' во парите.