Велес нема дежурна аптека
ВЕЛЕС - По 22 часот во Велес не работи ниту една аптека.
Подрачната единица на Фондот за здравствено осигурување со соопштение ги известила граѓаните и аптеките дека се укинува ноќното дежурство кое се практикуваше изминатите две години. Поради ова, ги повикуваат граѓаните во текот на работното време на аптеките да се снабдат со лековите кои не се издаваат на рецепт, но и со оние лекови кои се за акутни и за хронични заболувања. За другите лекови и интервенции Фондот ги упатува граѓаните кај матичните лекарите кои имаат обврска за 24-часовна грижа на пациентите преку склучување договори за ЈЗУ Здравствен дом, кој ќе треба да организира дежурна служба. Граѓаните се незадоволни. „Сега ќе треба да си направиме аптека дома, па ако има потреба, да земаме од тие лекови“, вели Трајанка Гинова, пензионерка од Велес. Некои од сопствениците на аптеките велат дека прометот во ноќните часови бил минимален и создавал големи трошоци. (С.Ќ.Н.) |
