Нови бисти на народните херои во Прилеп
Новите бисти во Паркот на револуцијата во Прилеп ќе бидат поставени до март
Во Паркот на револуцијата во Прилеп до март ќе бидат поставени нови бисти на народните херои, кои пред повеќе од две години беа украдени. Веќе се изработени калапите на седум од десетте бронзени бисти, колку што исчезнаа и никогаш не беа пронајдени. Во својата работилница во Прилеп ги изработува академскиот скулптор Емил Солески.
„За два месеца се готови калапите на бистите на хероите Кире Гаврилоски, Орде Чопела, Рампо Левката, Борка Талески, Круме Волнароски, Лазо Филипоски и на Борка Велески-Горанов. Чест ми е што ги изработувам бистите на хероите. До крајот на февруари ќе бидат излеани во бронза во работилница во Скопје, за во март тие да се вратат на местото кое им припаѓа – на постаментите во Алејата на хероите во Паркот на револуцијата“, изјави скулпторот Солески.
За изработката на бронзените бисти општината намени 1,3 милиони денари, во кои со 40 отсто учествува Министерството за култура.
„Се уште не се пронајдени крадците. Кога и да се најдат ќе инсистираме на најригорозни казни. За да не се случи уште еднаш вакво вандалство, работиме на проект со полицијата за заштита на сите значајни обележја во Прилеп. Во Паркот на револуцијата сега функционира чуварска служба“, рече Марјан Ристески, градоначалник на Прилеп.
Пред повеќе од две години од постаментите во Алејата на хероите во Прилеп беа украдени седум од десетте бронзени бисти на народни херои кои загинаа во Народноослободителната војна. На постаментите останаа само бистите на Мирче Ацев и на Кузман Јосифоски- Питу, а бистата на Илија Игески-Цветан, која беше турната и оштетена се наоѓа во музејот од каде ќе се врати на своето место.
За годинава општина Прилеп планира два монументални споменика – еден за крвавиот настан кај Карпалак во 2001 година и голем споменик на Крали Марко. (МИА) |
