Кина заинтересирана за економска соработка со Македонија
Кина и' два силна поддршка на Македонија за членство во НАТО и ЕУ под нејзиното уставно име и ги поздравува реформите на Владата за подобрување на вкупната бизнис- клима, потенцирајќи ја важноста на соработката помеѓу бизнис-заедниците на двете земји. Заради унапредување на односите меѓу Кина и Македонија, вицепремиерот Зоран Ставрески и вицепремиерот на Државниот совет на Народна Република Кина, Џанг Деџијанг, вчера во Скопје потпишаа четири документи кои претставуваат промоција на односите меѓу двете земји и континуираната соработка на билатерален план.Потпишани се Спогодба за економска и техничка соработка, Писмо за соработка во областа на развојот на човечките ресурси, Извршна програма за соработка во областа на културата за периодот 2008-2011 година и Меморандум за разбирање меѓу Агенцијата за странски инвестиции на Република Македонија и Бирото за промоција на инвестиции при Министерството за трговија на НР Кина.
Четирите документи потпишани со уставното име на Република Македонија отвораат можности за соработка во областа на економијата, трговската размена, образованието, културата и високата технологија.
Кина изрази и подготвеност делегација од 100 кинески бизнисмени да ја посетат Македонија заради инвестирање и воспоставување бизнис-релации со македонски компании. Изразен е интерес и за унапредување на соработката на полето на туризмот, преку афирмирање на Македонија како атрактивна туристичка дестинација помеѓу кинескиот народ. Во знак на пријателство на кинескиот народ кон нашата земја, НР Кина ќе додели грант на Република Македонија во износ од 11 милиони јуани за развој на човечките ресурси. Кина ќе им помогне на македонските граѓани со можност за изучување на кинескиот јазик во Македонија преку формирање Институт Конфучие во државата. (МИА) |
