Макрадули: Нема да распишам избори

Отпатува целиот државен врв, па Македонија е оставена на тројцата потпретседатели на парламентот

Оливера Војновска


Македонија два дена е оставена без пилот во авионот. Во исто време од земјата отсуствува целиот државен врв: претседателот Ѓорѓе Иванов, шефот на парламентот, Трајко Вељаноски, и премиерот Никола Груевски. Иванов од вчера е во дводневна официјална посета на Црна Гора. Вељаноски, пак, од понеделникот е во официјална посета на Канада и, според најавите, треба да се врати наредниот понеделник - 8 ноември. А, за да биде ситуацијата куриозитетна, во државата го нема ниту премиерот, кој е во официјална посета на Украина.

Уставот прецизира дека „во случај на спреченост да ја врши функцијата, претседателот на Републиката го заменува претседателот на Собранието“. Но, додека Иванов разговара со црногорските власти, Вељаноски ја предводи собраниската делегација во чиј состав се пратениците Андреј Петров од СДСМ, Александар Николоски од ВМРО-ДПМНЕ, и Сафет Незири од ДУИ на средбите со неговиот канадски колега, претседателот на Претставничкиот дом на Парламентот, Питер Миликен, и со претседателот на Сенатот на Канада, Ноел Кинсела. Државата е практично оставена на тројцата потпретседатели на Собранието: Светлана Јакимовска од ВМРО-ДПМНЕ, Рафис Алити од ДУИ и Јани Макрадули од СДСМ.

Макрадули, повикувајќи се на член 61 од Деловникот, вели дека претседателот на Собранието го заменува еден од тројцата потпретседатели, но според претходно утврден редослед. Тој тврди дека таков редослед не е направен, меѓутоа мисли дека овој пат нему му е редот да го заменува Вељаноски. И на шега додава: „Нека не се грижат, нема да распишам предвремени избори!“

Сепак, ниту Макрадули ниту другите двајца потпретседатели на парламентот, според Уставот, не може да го заменуваат претседателот на државата. Па, во една хипотетичка ситуација, доколку државата, не дај Боже, се најде во одредени специфични околности: непосредна опасност од напад, или и' се заканува природна непогода и епидемија, нема да може да се прогласи воена или вонредна состојба. Имено, таква одлука носи Собранието со двотретинско мнозинство гласови, но по предлог на претседателот на државата. А во случај кога Собранието не може да се состане, одлуката ја носи шефот на државата.

Макрадули, коментира дека ова е неодговорен однос кон функцијата и институциите. „Пред десетина дена во Македонија беше премиерот на Црна Гора, Мило Ѓукановиќ, не разбирам која е потребата сега претседателот Иванов да оди таму“, смета Макрадули.