„Таксират“ ја преврте работата по свое
По десеттото издание на фестивалот во „Метрополис арената“ на Скопски саем
Јубилеите, па дури и кога славениците не инсистираат на нив, некако наведуваат на рекапитулации. По десеттото издание на фестивалот „Таксират“, кој всушност официјално завршува вечерва со Позитивниот концерт во „Хавана“, како само од себе доаѓа „чуденката“: кога пораснаа „таксиратлии“? Притоа, никако не треба да се интерпретира во смисла: кога, како остареа, и како им прилега? Зашто за сите овие десет години постоење „Таксират“ покажа дека не се старее, дека нема намера да „прилегнува“, како се превртува работата по свое... Се' на се', израсна една генерација „таксиратлии“ - публика која може да се пофали во својата биографија дека растела со една урбана манифестација, на која настапувале „ѕверки“ од рок- жанрот. Во 1999 година „Таксират“ започна како „чудо за еден ден“, а на десеттиот јубилеј - десетина дена го „превртуваше“ Скопје и пошироко, со концерти, мини - филмски фестивал, со „Винер фест“... и како финале - финалната вечер на 29 ноември во „Метрополис арената“ на Скопски саем.
Годинава мотото на „Таксират“ беше „Преврти го Скопје наопаку“, и започнувајќи од 19 часот, па до четири изутрина, на сцената се менуваа повеќе музичари и групи, диктирајќи секој свој ритам и „филм“ за публиката, развивајќи го расположението. Почнувајќи од почетниците, македонската група „Бернис пропаганда”, преку Невил Стејпл од „Д’ спешлс”, па легендарниот Американец Марки Рамон од бендот “Д’ Рамонс” и повторно домашната група „Суперхикс”, атмосферата добиваше градација.
Сепак, најголемото раздвижување на публиката и најпозитивните вибрации проструија со настапот на славните хип-хопери од Филаделфија “Д’ Рутс “, некаде пред полноќ. По нив журката продолжи во технофазон со англискиот хаус дует „Аудио булис” и лондонскиот дип даб хаусдует „Свејзак”. Во стилот на „превртената“ филозофија на „Таксират“, во паузите додека се менуваа музичарите на сцена се слушаа песни од Александар Сариевски. Но, очигледно, „Таксират“ за своето деветгодишно постоење и десетте изданија создаде публика, што и' верува на неговата „превртена филозофија“. (Ј.П.)
|
