Насловна

ВМРО-ДПМНЕ и рејтингот: допир на недопирливите

Колапсот на популарноста на владејачката партија се случи во 2009

Соња Крамарска

Да падне една политичка партија од популарност што и' дава двократна и трикратна предност пред ривалот на рејтинг што отсликува драстично намалена разлика во процентот на поддршка, е сензација што деновиве и' се случува на владејачката ВМРО-ДПМНЕ. Институтот за политички истражувања грубо ја врати ВМРО-ДПМНЕ во реалноста, објавувајќи дека има поддршка од 23,5 отсто од граѓаните наспроти опозициската СДСМ, чија популарност е 13 отсто. Или накусо, разликата е 10 проценти, што најкратко кажано, значи дека владејачката партија - паѓа.

Ист резултат даде и анкетата на „Дневник“, различни бројки, но идентичен сооднос - 25,1 на ВМРО-ДПМНЕ и 15,2 за СДСМ. Всушност, овде може да се говори и за симболичен, но индикативен дополнителен пад на популарноста на ВМРО-ДПМНЕ, бидејќи на претходното истражување разликата е 10,5 проценти, а на овдешното изнесува 9,9 проценти.

Зошто паѓа ВМРО-ДПМНЕ, чиј лидер и премиер Никола Груевски, повеќе како никој досега се раководи од јавното расположение и дава огромни суми пари од буџетот за да задоволни различни групи граѓани: невработени што на големо ги вработува во администрацијата, земјоделци, студенти, ученици, чии родители треба да гласаат за ВМРО-ДПМНЕ. Дали по близу петгодишно владеење заврши ерата на „пари за глас“ и македонските избирачи влегоа во критична фаза на соочување со реалните (не)успеси на Владата.

Аналитичарите посочуваат дека има шест фактори што му пресудија на Груевски и неговата политика „пари за глас“. Тоа се нерешавањето на спорот со името што ги одврати странските инвеститори од Македонија, постојаниот пораст на цените на мало, но и на енергијата, зголемувањето на меѓуетничките тензии, демонизирањето на политичкиот противник СДСМ, ограничување на медиумските слободи и заострувањето на реториката кон Брисел од Вашингтон од страна на истакнати личности од десницата.

Но, иако најголемиот дел од случувањата во тие области кулминираа на крајот на минатата и во почетокот на оваа година, популарноста на ВМРО-ДПМНЕ почнала да паѓа незабележано уште во 2009 година. Всушност, тогаш дојде до драматичното намалување на соодносот меѓу рејтинзите на ВМРО-ДПМНЕ и СДСМ.

Во јануари 2009 година Интернационалниот републикански институт (ИРИ) објави фантастична предност на ВМРО-ДПМНЕ над СДСМ во сооднос 38 со 9 проценти - рејтинг што и' овозможи на владејачката партија да триумфира во март истата година на претседателските и на локалните избори. Оттогаш, колата тргна надолу.

Во октомври 2009 година ИРИ спроведе анкета во која за првпат е забележан рапиден пад на владејачката партија, или 32 наспроти 11 проценти за СДСМ. Тогаш ВМРО-ДПМНЕ молскавично реагираше со сугестии до некои провладини медиуми („Нова Македонија“) дека им пораснал рејтингот во однос на јуни, а, всушност, тоа е годината на најголем пад на популарноста на владејачката партија.

Дали владината локомотива се измори од двата изборни циклуса - вонредните избори во 2008 и претседателските и локалните избори во 2009 година. Или постизборниот период ја намали мотивацијата на Груевски да кокетира со избирачите навикнати на постојани финансиски трансфузии од Владата во Скопје.

Правејќи го сценариото за вчерашниот самит на врвот, премиерот Никола Груевски вели дека на своите соработници им рекол дека средбата меѓу него и Бранко Црвенковски има тактичка заднина. Пред да излезат двајцата на предвремени избори, Груевски сакал да види со каква енергија располага неговиот ривал, кој за разлика од премиерот, зад себе има преживеано многу изборни победи и порази и дали се реални заканите дека ќе го испрати во опозиција.

Груевски пред себе на маса распослал мапа на која непријателите - СДСМ, неколку медиуми и одредени амбасадорски фигури биле одбележани со црвени маркери, а коалициските партнери и пријателските медиуми ги одбележил со зелен маркер. Така барем гласи анегдотата, која вели дека на премиерот му се брза да оди уште на едни вонредни избори додека остварува предност над ривалската СДСМ. Дали тоа ќе биде крајот на една убава фатаморгана што им се прикажа на македонските граѓани среде сиромаштијата и безнадежноста.