Седниците на тетовскиот Совет на ТВ-екрани

ТЕТОВО - Седниците на Советот на Општина Тетово наскоро ќе се пренесуваат на локалните телевизии. Најмалку две телевизиски станици на македонски и на албански јазик ќе вршат директен пренос од работата на Советот. Ова била иницијатива на советникот на НСДП, Зоран Митревски, која едногласно била прифатена од сите советници.

„На граѓаните на Тетово треба да им покажеме што работи Советот. Самиот факт што работата на овој орган станува јавна, го подигнува нивото на квалитетот, советниците ќе чувствуваат поголема одговорност, а ќе бидат и поактивни. Тоа во крајна линија води кон поголема демократизација. Најважно е тоа што граѓаните имаат можност за увид во активноста на своите избраници“, изјави Митревски.

Локалната самоуправа ја проучува иницијативата за ТВ-пренос на седниците, особено, деталите за техничките можности на тетовските локални телевизии. Се најавува распишување тендер, бидејќи во Тетово има по две телевизии на двата јазика.

Според идејата за Тв-преноси, на почеток седниците на Советот би се снимале и од нив би се подготвувале широки извадоци, со обврска за тонски парчиња од секој учесник во расправите. Во втората фаза се очекува и директно вклучување на камерите во големата сала на Советот на Општината, каде што се одржуваат седниците. (Г.Е.)