Бизнисмените бараат 20,6 млн. евра од Буџетот

Буџетска поддршка од 20,6 милиони евра бара Стопанската комора на Македонија со цел да се зголемат инвестициите, инфраструктурата и извозот. Предлозите што му ги испорача на Министерството за економија се одобрување на 10 милиони евра за субвенционирање на каматни стапки на кредити наменети за претпријатија, кои над 50 отсто од своето производство реализираат во странство, пет милиони евра за опремување на национални лаборатории и нивна акредитација што е неопходна за проверка на квалитетот на производите во земјата.

За поголем пласман на домашните производи на соседните пазари од СКМ бараат и поддршка од четири милиони евра за домашните трговски фирми за изградба на два продажни капацитета во Србија и во Албанија на кои приоритетно ќе се продаваат домашни производи, 500 илјади евра за субвенционирање на камати за поддржувачки кредити за набавка на производи од домашно производство и 100 илјади евра за исплата на извозни рефундации на агроиндустрискиот комплекс на нови пазари, како што се Блискиот и Средниот Исток и Северна Африка.

„Оваа насока на буџетот од социјален во развоен треба да продолжи и во наредниот период затоа што во изминатите 15 години таа компонента не можевме да ја видиме. Бараме низ буџетот да се покаже подготвеност дека со определени средства ќе се помогне и поттикнат производството и извозот како клучни компоненти за забрзан економски развој на државата“, изјави Бранко Азески, претседателот на СКМ по средбата со министерот за економија. Тој рече дека Комората ја поддржува Владата за ново задолжување што ќе биде наменето за инфраструктурата, со цел да се завршат коридорите 8 и 10 и гасоводниот систем.

„Барањата ќе бидат разгледани, ќе имаме дополнителни средби за да одлучиме како овие предлози да бидат рефлектирани наредната година за Македонија да остварипоконкурентна економија“, изјави Фатмир Бесими, министер за економија. (Ек.Р.)