Претседателот Иванов приреди прием за поранешните претседатели

Светлана Унковска

Македонија вчера го прослави 8 Септември, со што ја одбележа 18-годишнината од независноста, самостојноста и сувереноста. Својата полнолетност државава ја прославува во моменти кога очекува да добие позитивен извештај од Европската комисија за напредокот на земјава, како и добивање датум за почеток на преговорите за зачленување во Европската унија. Прославата на Денот на самостојноста на државава, иако се одржаа низа манифестации, сепак, измина во сенката на трагедијата во Охрид со потонувањето на бродот „Илинден“, во која загинаа 15 бугарски туристи.

За празникот на македонската државност, претседателот Ѓорге Иванов приреди прием во претседателската вила за поранешните претседатели на Македонија, Киро Глигоров, Бранко Црвенковски и за Вилма Трајковска, сопруга на трагично загинатиот претседател Борис Трајковски. Вчеравечер претседателот Иванов, по повод Денот на независноста, во Македонската опера и балет организираше и Свечена академија на кое беше предвидено и пригодно обраќање. Претходно и претседателот на Собранието, Трајко Вељановски, организира свечен прием по повод празникот, а во своето обраќање пред голем број присутни истакна дека Македонија очекува од Европската комисија позитивен извештај и препорака за датум за преговори со ЕУ.

Иванов во својата честитка до граѓаните по повод празникот рече дека 18 години слободно го живееме сонот на бројни генерации. „Благодарение на сите, Македонија се градеше и се развива како слободна и демократска држава, како земја отворена кон светот, која не се плаши да го даде својот придонес и да ги отвори своите граници. Денес ги минуваме финалните чекори кон утврдувањето на нашиот статус како рамноправен партнер на слободните држави во светот“, истакна во своето обраќањето Иванов. Тој, притоа, не заборави да потсети дека Македонија и денес е изложена пред многу предизвици, како што е светската економска криза и долгите интегративни процеси, но не се сомнева дека земјава ќе докаже оти може да напредува и да се развива.

Претседателот на парламентот, Трајко Вељановски, честитајќи го празникот, истакна дека Македонија опстојува со чувство на слобода и љубов, но и дека со гордост гледа кон својата иднина. Во очекување на есенскиот извештај на Европската комисија, Вељановски истакна дека македонското Собрание ги усвои сите потребни закони. „Реформите што ги правиме не треба да се сфатат како нешто наметнато однадвор, туку како наша определба за држава во кое ќе владее правото, демократијата и човековите права и слободи, односно држава во која граѓаните ќе ги уживаат истите стандарди кои денеска ги има европскиот граѓанин“, рече Вељановски.

Денот на независноста на македонските граѓани и посебно на припадниците на АРМ им го честиташе и министеро�� за одбрана, Зоран Коњановски. „Како припадници на АРМ, која е столбот на нашата државност, давате полн придонес во процесот на изградбата на современа македонска држава и вие сте гаранти за нејзината сувереност и независност. Покрај тоа што ги чувате границите на Македонија, како учесници во мировните мисии, чувари сте и на светскиот мир, со што покажувате дека сте најзначајните македонски амбасадори“, се вели во честитката на Коњановски.

Премиерот Никола Груевски на вчерашниот празник присуствуваше на свеченото поставување камен-темелник за изградба на западната и источната трибина на националната арена „Филип Втори Македонски“, како и на камен-темелникот на изградбата на комерцијални станови.