Владата ќе плаќа струја за сиромашните, но по десет месеци

Нина Нинеска-Фиданоска


Најсиромашните семејства во земјава ќе добиваат пари од државата за да платат дел од сметките за струјата што ќе ја потрошат. Но, иако оваа мерка ќе почне да важи дури од средината на идната година, а можеби е најпотребна сега во време кога граѓаните ги чувствуваат најсилните удари од економската криза, премиерот Никола Груевски одлучи вчера да и' ја соопшти на македонската јавност, иако беше празник, Осми септември. Се разбира, тој како и вообичаено, беше поддржан од речиси целиот свој министерски тим, занемарувајќи го фактот што Владата се' уште нема ништо прецизирано на тој план, во смисла какви критериуми треба да исполнат семејствата за да ја добијат оваа државна помош, по колку пари ќе добиваат, колку струја ќе смеат да потрошат, но и многу други отворени прашања.

Засега најверојатна е опцијата дека сиромашните семејства ќе добиваат од државата ваучери со кои ќе ги покриваат дел од сметките за струја. Познато е и дека оваа мерка ќе го чини државниот буџет меѓу 4,1 и 7,3 милиони евра годишно. „Владата на вчерашната седница го донесе Акциониот план за намалување на т.н. енергетска сиромаштија, а најзначајна одлука е воведувањето социјална заштита за најсиромашните и најранливи категории потрошувачи. Со оваа мерка, Владата ќе субвенционира дел од трошоците на најсиромашните граѓани, за покривање на трошокот за различни видови енерегенси, а пред се' на електрична енергија. Оваа мерка ќе обезбеди секој месец директна финансиска поддршка за најсиромашните граѓани. Вкупната поддршка на социјалните категории граѓани преку овој социјален пакет ќе изнесува меѓу 250 и 450 милиони денари на годишно ниво“, изјави вчера Груевски.

Владата планира до средината на октомври, заедно со подготовките на буџетот за 2010 година, во детали да ги прецизира категориите социјални корисници и поединечниот износ на средства за одделно домаќинство. Намерите се до крајот на годинава Законот да биде прифатен од парламентот и до средината на идната година да стапи во сила.

На прашањето дали е в ред Владата да држи три преса во текот на пет дена со кои ќе се фали за економски мерки, од кои последнава се' уште целосно е маглива и ќе стартува дури по десет месеци, Груевски самоуверено изјави: „Секогаш кога ќе оцениме дека носиме исклучително значајна одлука за граѓаните и која ќе опфати поголем број граѓани, сметаме дека е важно да ја соопштиме на ваква прес-конференција, за информацијата да стигне подалеку. И така ќе продолжиме и во иднина“. Груевски не мисли дека вчерашниот прес е чист маркетинг, како што му забележаа новинарите.

Опозицијата експресно реагираше нагласувајќи дека ваква мерка треба да почне да важи веднаш. Според Емилијан Станковиќ, член на Извршниот одбор на СДСМ, во услови на ниту едно реализирано ветување во изминативе три години, премиерот Груевски набрзина со плагијат-проекти се обидува да ја скрие паниката од слабите економски резултати. Тој го презентира и предлог��т на СДСМ, при расправата за ребаланост на буџетот да се предвидат средства за 80 илјади семејства по 1.000 денари месечно за покривање на сметките за струја.