Обвинителката жестоко го нападна Васил Тупурковски
Со многу жар во својот настап јавната обвинителка Вилма Русковска вчера го даде својот завршен збор во процесот што подолго време се води против поранешниот прв човек на Агенцијата за обнова и развој, Васил Тупурковски, и неговиот заменик Јован Андонов.
Обвинителката најпрвин се повика на конечниот ревизорски извештај за 2002 година, според кој се' започнало со спогодбата од 23 јули 1999 година за заем од 20 милиони долари, а кој бил склучен помеѓу Република Македонија и Комерцијалната банка на Кина. Русковска рече дека обвинувањат не се само од Обвинителството, туку и од Државниот завод за ревизија, кој кажал дека АОР самата префрлала кредити беа притоа да постојат одредени критериуми. За Обвинителството е неоспорно дека АОР ги поседувала средствата и дека Агенцијата решавала со кого ќе биде потпишан договор и кому ќе му биде доделен кредит. Таа рече дека е невозможно имателот на средствата да дозволи банката да му наложува каде ќе ги насочува тие.
Јавната обвинителка рече дека Владата дала согласност за кредит од 7,5 милиони долари и тоа за откуп на тутун, но дека немало согласност и за живинарски фарми и за откуп на грозје. Русковска во својот завршен збор рече дека поранешните министри Борко Андреев и сегашниот кандидат за градоначалник Марјан Ѓорчев сведочеле како што сведочеле, бидејќи не знаеле што содржела спогодбата за заем од банката во Тајпеј.
„Очигледно дека со овие луѓе не живееме на иста планета, а не, пак, во иста држава“, рече Русковска, посочувајќи ги притоа двајцата обвинети. За неа е несфатливо како може стечаен управник да знае дека фирма во стечај не може да конкурира за кредитна линија, а професор по правни науки тоа да не го знае, алудирајќи притоа на кредитор што АОР и' го одобрил на кочанската фирма ИФВ. Обвинителката рече дека не е точно тоа оти за добиваме на кредит требало да се приложи и развојна ��рограма и се праша како дошло до тоа кредитите за живинарските фарми да завршат кај фирмата „Тикон“, но и дека не е познато што се случило со домашното вино, како и тоа дека Тупурковски и по окончувањето на функцијата директор на АОР, сепак, од Владата ги имал сите овластувања. На крајот од својот завршен збор обвинителката рече дека кредитите не само што не се вратени туку дека државава двапати годишно плаќа за каматите на тајванските кредити.
Судењето продолжува денеска со завршен збор на обвинетите и на нивните бранители. (Љ.С.) |
