Масерка уценувала клиент со фотографии
Полицијата поднесе кривична пријава против скопјаните М.К. (21) и Б.С.(45), затоа што на 67-годишник од Скопје му се заканувале дека на Интернет и во весниците ќе пуштат компромитирачки фотографии од него ако не им даде 5.000 евра.
Според МВР, М.К. била вработена како масерка во козметичкото студио „Зока” во населбата Маџари, каде што пред неколку недели се запознала со 67-годишникот, кој користел масажи во салонот. По кусо време, освен масажи, М.К. почнала да му дава и сексуални услуги, за што добивала до 3.000 денари. Но, при една средба во салонот „Зока“, девојката го наместила мобилниот телефон и без да знае клиентот, го снимала додека имала орален секс со него. Потоа, му се јавила на телефон и го уценувала да и' даде 5.000 евра. Се договориле да добие 1.000 евра, но 67-годишникот го пријавил случајот во полиција, која му дала обележани пари.
Биле договорени да се најдат во едно кафуле во градот. Масерката побарала помош од својот пријател Б.С. (45), кој со автомобил ја донел на договореното место. Клиентот ги предал парите, а за возврат ги добил фотографиите, но штом се разделиле, полицијата ги уапсила уценувачите.
Во МВР информираат дека Б.С. и порано бил познат по кражби. (Г.А.) |
