Со кредити од ЕБОР и ЕИБ ќе се градат пруги, хидроцентрали...

Груевски и Ставрески задоволни од довербата што ја имале во земјава овие две институции

Нина Нинеска - Фиданоска



Со кредити од Европската банка за обнова и развој и од Европската инвестициона банка во Македонија, во следните неколку години ќе се градат железнички пруги, хидроцентрали, гасоводниот систем, патишта... Ваквите најави стасаа од Загреб, каде што вицепремиерот и министер за финансии, Зоран Ставрески, учествуваше на Годишното собрание на ЕБОР.

Македонија во следните неколку години од ЕБОР очекува кредити од близу половина милијарда евра за вакви крупни инфраструктурни проекти. Во ресорот за финансии објаснуваат дека иако станува збор за кредити, тие на земјава ќе и' се доделат под многу поволни услови, со ниски каматни стапки. Големи суми заеми за вакви инвестиции се очекуваат и од Европската инвестициска банка.

„Македонија има многу добар третман кај ЕБОР и ЕИБ. Овие две банки не само што досега беа значајни партнери на нашата земја, туку се расположени, како што се приближуваме во процесот на интеграција кон Европската унија, со повеќе средства да дадат поддршка за економскиот развој на земјата. Добро беше да се види дека овие две значајни инвестициски банки ја гледаат бизнис-климата во Македонија како поволна“, изјави Ставрески по билатералните средби со високи претставници од двете банки.

И премиерот Никола Груевски е задоволен од овие најави. Тој вчера изјави дека тоа се должи на довербата што ја имаат спрема Македонија овие влијателни финансиски институции. „Заинтересираноста е навистина добар сигнал и укажува дека двете главни институционални финансиски институции и банки во Европа имаат доверба во македонската економија и сакаат да инвестираат поголеми средства во патната и железничката инфраструктура, енергетиката и во други проекти. Тие ќе го подобрат квалитетот на живеење во државата и ќе ја зголемат енергетската сигурност“, истакна Груевски.

Инаку, ЕБОР е заинтересирана да инвестира околу половина милијарда евра во следните неколку години во Македонија во проектот за ревитализација на железничката пруга од Коридорот 10, проектот за изградба на железничката пруга од Коридорот 8 на релација Куманово - Деве Баир, како и во изградбата на гасоводниот систем во Македонија. Од македонска страна е побарано банката да инвестира и во изградбата на една од хидроцентралите што планира да ги гради ЕЛЕМ во следниот период, за што е добиено ветување дека во следните неколку месеци ова прашање ќе биде разгледано од страна на Бордот на директори. Најверојатно, тоа ќе биде ХЕЦ „Бошков Мост“, проект вреден 80 милиони евра. Банката со 50 милиони евра учествува и во проектот за ревитализација на регионалните и локалните патишта во државата.

Интерес за инвестирање во проектот за изградба на железничката пруга кон Бугарија и за гасоводниот систем пројавила и ЕИБ. Ставрески разг��варал со претставниците од ЕИБ и за кредитната линија од 100 милиони евра за мали и за средни претпријатија. Друг проект што ќе биде финансиран со заем од 50 милиони евра од ЕИБ е изградбата на канализационите и водоводните системи во руралните средини. Со претставниците на ЕИБ било разговарано и за заокружување на финансиската конструкција за автопатот на Коридорот 10, на делницата Демир Капија - Смоквица, инвестиција од 200 до 250 милиони евра, во која главниот финансиер е оваа банка. „Доколку не е доволно тоа, веројатно ЕБОР ќе ги дополни средствата за да го дозиградиме Коридорот 10 и на тој начин да ја подобриме конкурентноста на земјата, бидејќи тоа е еден од главните коридори во Македонија“, појасни Ставрески.

Инаку, ЕБОР предвидува дека оваа година Македонија и Србија ќе имаат најголем раст на бруто домашниот производ во Југоисточна Европа. Македонија во тековнава година ќе забележи 2,2 отсто раст на економијата, а Србија 2,1 процент. Според премиерот, ова е добра вест, што укажува дека политиката на Владата е на вистинскиот пат за излез од глобалната криза. „Тоа е добра вест која покажува дека ЕБОР прогнозираше поголем раст од самите нас. Тоа е добар сигнал и укажува дека макроекономските политики на Владата се добри и се на вистински пат за заздравување од глобалната криза“, изјави Груевски.