На „Сунчане скале“ триумфираше ќерката на директорот
Последната главна вечер на црногорскиот интернационален музички фестивал „Сунчане скале“, „Песна на летото“, заврши со скандалозна одлука за победа на Александра Бучевац, ќерка на првиот човек на фестивалот што од 7 до 9 јули се одржа на Канли кулата во Херцег Нови.
Ќерката на директорот ја доби и главната премија - автомобил „киа“ и 10.000 евра парична награда, со што по вторпат успеа да триумфира на фестивалот откако пред три години ја освои првата награда во вечерта на нови ѕвезди.
Александра Бучевац настапи на Канли кула со песната „Остани“, за која како коавтор на стиховите се јавува и македонскиот текстописец Огнен Неделковски. Второто место и' припадна на Маја Оџаклиевска, која пееше во дует со Славен Кнежовиќ, а на третата позиција се пласираа „Бјути квинс“.
Единствениот македонски претставник во главната вечер на „Сунчане скале“ Марјан Стојановски, кој ја испеа песната „Касно је“, на авторите Григор Копров, Огнен Неделковски и Владимир Дојчиновски, мораше да се задоволи само со седмата позиција. Патем, во жирито кое ги оценуваше пејачите беа и двајца македонски претставници - Ѓоко Горчев, кој му даде максимум поени на Стојановски и Даниел Милошевски од „Авалон“, кој на својот сонародник му додели единствено три поени, што многумина го прокоментираа како реваншизам спрема Григор Копров, кој пред три години и' даде два поена на нивната пуленка Каролина Гочева и темата „Ружо, Ружице“.
Трето место за Игор Митровиќ во
вечерта на нови ѕвезди
Младиот македонски пејач Игор Митровиќ го освои третото место (бронзена статуета) во втората вечер на интернационалниот музички фестивал „Сунчане скале“. Митровиќ настапи во вечерта посветена на младите муз��чки таленти т.н. „Нови ѕвезди“, а успеа да се пласира во топ-три благодарение на интерпретацијата на песната „У магли љубави“ на авторите Владимир Дојчиновски и Весна Малинова. Првото место го освои Бети Буп, која пееше „Добар дан“, а како второпласирана заврши Ања Машановиќ со темата „Нема љубави без тебе љубави“. |
