Живко Радевски сака да го рестартира „Сведмилк“

Тој поднел иницијатива до стечајниот управник за повторно да го стави во функција овој капацитет

Александрија Стевковска


Живко Радевски, поранешен директор на ИМБ, кој практично ја изменаџира и продажбата на овој најголем млечен капацитет во земјава, сака да ја рестартира „Сведмилк“. Тој поднел иницијатива до стечајниот управник на шведската млекарница, Богољуб Макревски, за повторно да го стави овој капацитет во функција. Сепак, иницијативата вчера не доби благослов од мнозинството доверители на фабриката.

Радевски поднел иницијатива до стечајниот управник на „Сведмилк“ за доставување бизнис-план за рестартирање на фабриката. За ова треба да гласаат доверителите поради што рочиштето за овој случај е презакажано за 11 јуни, кога би требало да биде донесена и конечната одлука за иднината на млекарницата.

„Најголемиот доверител на млекарницата, НЛБ Тутунска банка, чие хипотекарно право стечајниот управник Макревски го призна, се изјасни против рестартирање на млекарницата. Овој најголем доверител бара ликвидација на ’Сведмилк‘“, изјави Ване Андреев, адвокат на Земјоделско-сточарскиот комбинат од Струмица, по вчерашното завршување на едно од многуте рочишта, на кои се расправаше за иднината на овој преработувачки млечен капацитет.

Според него, противењето на НЛБ Тутунска банка било пресудно да се одложи одлуката дали фабриката ќе се рестартира. „Се остави време и останатите доверители да се произнесат за иницијативата за рестартирање, за која верувам дека ќе биде прифатена. Доколку рестартирањето како варијанта биде прифатено, по 45 дена, треба да се достави планот за рестартирање до доверителите, за кој тие треба да се произнесат“, објасни Андреев.

И додека се одолжува одредувањето на натамошната судбина на „Сведмилк“, сточарството во Македонија тоне.

Фармерите останаа без крави, државата без млеко. Млекарниците увезуваат млеко и млечни преработки. Уништувањето на сточарството поради „Сведмилк“ со себе надолу го повлече целиот синџир во земјоделството. Тоа го докажуваат и најновите податоци на Заводот за статистика за бројноста на добиточниот фонд и продукцијата на млеко.

Имено, според податоците на Државниот завод за статистика, во 2009 година, во споредба со 2008 година, вкупниот број говеда е намален за 0,4 отсто.

Намалувањето на бројот на говедата кај индивидуалните земјоделски стопанства изнесува 0,4 отсто, додека бројот на говедата кај земјоделските претпријатија и земјоделските задруги е зголемен за 1,4 отсто.

Намалено е и ��роизводството на млеко во 2009 година. Така минатата година биле произведени 394.942 илјади литри, што е за 9,8 отсто помалку од годината пред неа. Според податоците на Статистика, лани во количините на произведено млеко, кравјото учествувало со 342.622 илјади литри, што е за 7 отсто помалку во споредба со 2008 година.