Млекото не се плаќало со кашкавал

Битолската Млекарница ги демантира сточарите во земјава, што завчера јавно тврдеа дека компанијата дел од откупеното млеко не го плаќа со пари, туку со сирење и со кашкавал. „Категорично ги отфрламе тврдењата дека ИМБ млекото не го исплатува, или се плаќа во компензација со сирење и кашкавал. Сметаме дека тоа се неосновани, инсинуирани и невистинити обвинувања, а луѓето што тоа го кажуваат не се кооперанти на ИМБ. Исплатата се врши во финансиски средства преку трансакциска сметка, и тоа во предвидените рокови. Поради тоа, ќе ги разгледаме сите законски и правни мерки, против оние што учествуваат во креирањето на овие невистини што го нарушуваат нашиот деловен углед“, е наведено во соопштението од ИМБ. (Ек.Р.)