Ќе се градат сноуборд- паркови, хотели...

Владата донесе одлука да инвестира во планинските туристички центри

Владата ќе го развива планинскиот туризам. Таа донела одлука да почне проект за инвестиции во планинските туристички центри, како и изградба на нови сместувачки капацитети со планинска конотација. Портпаролот на Владата, Александар Ѓорѓиев, на вчерашниот прес рече дека вака ќе се создадат услови за поголем развој на планинскиот туризам, со што ќе се зголеми локалниот економски развој на општините и ќе се отворат нови работни места.

Во рок од триесет дена од денес, општините Кочани, Берово, Крушево и Делчево треба да распишат постапки за отуѓување градежно земјиште сопственост на државата, по пат на јавно наддавање за сите наведени локалитети. „Во првата напредна фаза се опфатени Пониква, Кочани, Етнопарк „Берово“ и Беровско Езеро, Крушево и Голак, Делчево, за кои ќе се распише постапка за отуѓување на земјиште, а во два од нив, Пониква и Крушево, ќе се инвестираат и 140 милиони денари за изградба на нови атрактивни спортски содржини“, рече Ѓорѓиев.

За Пониква, на конкретната локација се предвидени 135 викенд-куќи и 12 комерцијални објекти и спортски терени. Комплексот, информира тој, е на површина од 20.000 квадратни метри, опкружен со шуми и пасишта, а до локацијата веќе е изграден пристапен асфалтен пат, обезбедена со вода и електрична енергија, и се наоѓа на надморска височина од 1.580 метри, во близина на ловниот резерват Осогово. За Берово е предвиден туристички комплекс „Етнопарк - етносело“, на површина од 53.500 квадратни метри, од кои 30 проценти се наменети за градби.

„Владата одлучи да започнат инвестиции во спортско-туристички содржини во туристичките центри Крушево и Пониква, Кочани. На истите овие локалитети ќе бидат изградени најмодерни сноуборд-паркови според сите светски стандарди, кои ќе опфаќаат изградба на специјализирани долги и кратки патеки, со соодветни препреки карактеристични за сноубординг, сноуборд-патеки и рампи“, рече портпаролот Ѓорѓиев. За таа цел, ќе се изградат резервоари за создавање вештачки снег што ќе овозможи користење на патеките независно од климатските услови, а во лето резервоарите ќе може да се користат како извор на техничка вода за граѓаните и компаниите. „Постапката за проектирање е веќе завршена, а во тек е постапката за избор на економски оператор за градба. Во следната недела ќе се почне со градба на сноуборд-паркот и патеката на Пониква, а следната ќе се почне со градба во Крушево“, изјави портпаролот на Владата и додаде дека доколку бидат поволни временските услови, се очекува уште во текот на оваа зимска сезона инвестициите да бидат завршени и да почнат да се користат. (Ек.Р.)