Концерт на пијано дуо на „Битолско културно лето“

Вечерва во рамките на „Битолското културно лето“, во Заводот и музеј во 20,30 часот, концерт ќе одржи „Дуо пијано“ во состав: Билјана Димовска и Татјана Божиновска. Како дуо, двете пијанистки настапуваат неколку години наназад, а на својот репертоар негуваат програма од периодот на барокот до модерната музика. Дуото има одржано повеќе рецитали низ земјава, во Битола, Ресен, Охрид, а последниот наста�� го оствари на Интернационалниот фестивал „Интерфест“ во Битола во 2009 година.

Вечерва, „Дуо пијано“ ќе се претстави со дела од Григ, Рахмањинов и Равел.

Пијанистката Билјана Димовска има настапувано на повеќе значајни манифестации во нашата земја. Добитник е на повеќе државни и меѓународни награди, а настапувала и како солист со Македонската филхармонија и со Симфонискиот оркестар при Факултетот за музичка уметност во Скопје. Настапува и како камерен музичар, а во 2005 година, заедно со саксофонистот Боби Коминовски, снимија ЦД. Пијанистката Татјана Божиновска, пак, има одржано повеќе концерти и рецитали во земјава, но и во Бугарија, Србија, Романија, Франција, Италија, САД, Хрватска, Австрија... Има настапувано и како солист со Македонската филхармонија и со Битолскиот камерен оркестар. Член е на триото „Интерарт“ со кое активно концертира во земјата и надвор, на меѓународни фестивали и натпревари и со кое досега сними три ЦД-а. Вработена е во Средното музичко училиште во Битола како професорка по пијано.