Работник загина во „Макстил“, несреќата како да не се случила
Никој не ја известил полицијата, Трудовата инспекција дознала по три дена, а за случајот молк и од Клинички
Горан Адамовски
Смртта на скопјанецот Јован Андонов (33) на работно место во железарницата „Макстил“ не го засега никого. Надлежните во железарницата саботната несреќа ја пријавиле во Трудовата инспекција дури во вторникот. Клиничкиот центар смета дека не била нивна работа да го пријават случајот во полиција. МВР ќе интервенира по службена должност, откако информацијата за смртта на скопјанецот ја прочитале во медиумите. На терен се' уште не излегол никој, иако од смртта на работникот поминаа неколку дена. Причините за несреќата се' уште не се утврдени. Јован Андонов го загуби животот во несреќен случај на работното место во саботата наутро. Андонов, кој бил трета смена на работа, сечел неколкутонска метална плоча, која паднала врз него. Веднаш бил пренесен во Клиничкиот центар, но поради тешките повреди, починал по два дена.
Иако работодавецот бил должен веднаш да го пријави случајот во полиција и во Трудовата инспекција, тоа не се случило.
„Случајот кај нас писмено е пријавен во вторникот. Се' уште не сме распоредиле кој ќе ја води истрагата. На терен би требало да излеземе денес“, изјави Мирослав Велковски од Трудовата инспекција во Гази Баба.
Дали работникот бил соодветно заштитен и зошто дошло до трагедијата, допрва ќе се утврдува. Од Трудовата инспекција укажуваат дека за работодавците што нема да пријават повреда на работник на работно место, следуваат казни во висина од пет до осум илјади евра.
МВР вчера се заинтересира за случајот, откако „Утрински“ ја објави веста за несреќата.
„Сега ќе дејствуваме по службена должност“, велат од полицијата.
Металната плоча паднала врз Андонов, згмечувајќи му го речиси целото тело. Со тешки повреди бил пренесен во Клиничкиот центар, од каде што никого не известиле дека примиле пациент повреден на работно место.
„Должност на работодавецот е да ја извести Трудовата инспекција и МВР, а наша обврска е само здравствена нега“, смета Соња Стошиќ, портпаролка на Клиничкиот центар.
Од „Макстил“ и вчера не сакаа да го коментираат случајот. Откако во вторникот изјавија „дека за случајот знаеле сите“, вчера тврдеа дека инспекцијата им забранила да даваат изјави додека не заврши истрагата.
Јован Андонов, кој се оженил неодамна, е татко на шестмесечно бебе. |
