Дожд ќе врне до среда

Влажниот и дождлив период во нашата земја ќе потрае и во наредните четири дена. Облачното време ќе биде заменето со сонце дури од среда наредната недела, кога се очекува и пораст на температурите, кои ќе се искачат до 24 Целзиусови степени. Синоптичарите прогнозираат стабилно и суво време од среда до 25 април.

Метеоролозите велат дека и наредниве денови подрачјето на Македонија ќе се наоѓа под влијание на серија влажни маси од Медитеранот, кои и понатаму ќе условуваат променливо и нестабилно време. И денеска ќе биде облачно со сончеви интервали, а попладне локално ќе има слаб до умерен развој на нестабилна облачност со краткотраен пороен дожд, засилен ветер и ретка појава на грмежи. Дневната температура ќе се искачи до 20 степени.

„Утре претпладне ќе биде променливо облачно, а попладне под влијание на влажен бран ќе биде претежно облачно со врнежи од дожд, кои во текот на ноќта на места ќе бидат пообилни. Температурата ќе биде во интервал од 11 до 19 степени. И в понеделник ќе биде нестабилно облачно со пороен дожд, засилен ветер и грмежи. Локално е можна и појава на невреме, а температурата ќе се спушти на 16 степени“, вели Лена Јовановска, дежурен синоптичар во УХМР.

Во вторник се' уште локално ќе има услови за развој на нестабилна облачност, а од среда ќе настапи период на стабилно и суво време со благ пораст на дневната температура. (Сн.К.)