Груевски се инаети со Брисел

Премиерот им ветувал на Рен и на Филе, а потоа не исполнувал договори

Слободанка Јовановска


Вицепремиерот Васко Наумовски вчера престојуваше во Брисел за да одглуми уште една рунда заинтересираност на Македонија за евроинтеграцијата. Дали се обидел да ја спушти топката по јавната порака од Штефан Филе околу фамозното писмо до премиерот, сепак, не можеше да се дознае со сигурност.

Неофицијално, законот за антидискриминација не бил главна тема на разговорите, а и Наумовски не е од таа категорија функционери да дава отчет пред еврокомесарот за проширување.

Тоа што Европската комисија си дозволи обелоденување на лична преписка со премиерот на државата и за да се забележи тоа првите зборови Филе ги напишал со рака, место на компјутер, треба да се сфати како пресвртната точка на Брисел кон нашата Влада. Пораката е - ние ќе ја известиме јавноста колку вие сте искрени во посветеноста кон евроинтеграцијата, а вие правдајте се пред граѓаните што во огромен процент даваат поддршка за неа.

Она што треба да одговори Груевски е зошто Влада што јавно кажува дека ЕУ и' е стратегиска цел, изгласува закони што Европската комисија ги оценува како антиевропски и надвор од регулативите на Унијата? Практично, еврокомесарот Филе првпат јасно покажа дека не верува во искрените намери на актуелната власт, дотолку повеќе што според дипломатски извори, не само на Оли Рен, туку и на актуелниот еврокомесар, Груевски лично му ветил дека ќе ја вклучи сексуалната антидискриминација во спорниот закон, па кога видел што изгласале пратениците на ВМРО-ДПМНЕ, буквално, доживеал шок.

Ова е, всушност, третпат Брисел да тврди дека премиерот Груевски нешто ветил, па не исполнил, од (не)изградбата на споменикот на Александар Македонски што упорно се најавува, па до Законот за антидискриминација во две прилики, пред донесувањето на одлуката за визна либерализација и сега. Ова не е, исто така, единствено инаетење на Владата кога се во прашање критериумите и регулативите на Унијата, што почна со одбивањето да ја вклучи ДУИ во владејачката коалиција, да го реши случајот со ЕВН во согласност со европските правила, па до најновиот случај со законот за водите што е приоритетен за Брисел, а Собранието го одложи за четири години.

Иако, генерално, Владата и досега влечеше потези откако ќе следуваа силни притисоци од Европската комисија и, практично, по многу натегнувања, ова е првпат таквиот манир да го примени откако Брисел ги испофали реформите во земјата и ни даде препорака за преговори.

По подолг период набљудување од страна на ЕК колку актуелната Влада е посветена на реформите, сега и Груевски, по се' изгледа, го тестира Брисел колку може да издржи во добрите оценки кон Македонија, додека ние контрираме. Бидејќи според ниту една анкета правата на хомосексуалците не се прашање од таква тежина како што е приемот во Европската унија и во НАТО, прашање што стои зад политичката логика и математика на премиерот, кога вака директно прави токму тоа што бараат од него да не го прави во ЕУ.

Едното објаснување е дека Груевски води инает со Комисијата за да и' врати за недавањето поддршка околу спорот за името, а второто, обратно, дека влече контрапотези за да не мора да ги трпи притисоците околу спорот со Грција, бидејќи условите ќе бидат многу повеќе од тој еден.

Факт е дека со ваква инаетчиска политика нашата Влада доби препорака од ЕК, но околностите оттогаш се сменија, па ако Брисел сфати дека нема подготвеност за решение околу името, нема да има мотив ниту да ги трпи импровизациите од Македонија.

„Сите земји-членки на ЕУ ја имаат недискриминацијата според сексуална ориентација во своите законодавства, а тоа треба да го сторат и оние што сакаат да станат членки на европското семејство. Исклучоци од ова нема“, наведено е во писмото на Филе до премиерот. Пораката е „земи или остави“, бидејќи ЕУ е таа што ги утврдува правилата, а Македонија треба да реши дали сака или не сака преговори.

Само дебели нерви и голема политичка фантазија може да помогнат ова што го прави нашата Влада во однос на Европската комисија да се сфати како подготовка за влез во Унијата. (С.Ј.)