Во Македонија има само четири осветлени тунели

Сите 15 тунели во државава имаат вкупна должина помала од три километри

Билјана Ангеловска


Во Македонија има се' на се' 15 тунели. Бројката можеби и не е толку мала, колку што објективно е нивната должина. Сите тие заедно достигнуваат едвај три километри, поточно 2.910 метри. Најголемиот тунел се наоѓа на делницата Велес - Катланово, кај селото Катланово и има должина од 713 метри и коловоз широк 8,40 метри. Овој тунел, иако е стар 30 години, сепак, е најнов, пуштен е во 1980 година кога е предаден во употреба овој дел од автопатот Велес - Скопје. Тунелот е осветлен на најгорната точка по средина.

Ниту овој ниту кој било друг тунел во Македонија нема странично осветлување. Единствено, во двата последователни тунела Демир Капија - Удово пред неколку месеци се поставени рефлектирачки тела по осовинската линија на коловозот и на рабникот. Одозгора е осветлен уште и тунелот од Катланово кон Велес, додека сите останати се неосветлени. Во темница се двата тунела од Катланово кон Велес, кај Башино Село, двата тунела на патот Охрид - Ресен, потоа тунелот на делницата Скопје - Блаце, како и на правецот Битола - Прилеп. Освен овие, има помали тунели и на неколку регионални патни правци, како што се тунелите на стариот пат Демир Капија - Удово, на патот Градско - Прилеп, Охрид - Свети Наум и Макази - Царина, близу Отешево.

Во Агенцијата за државни патишта велат дека тунелите не се електрифицирани, бидејќи се многу куси, во нив се гледа од едниот до другиот крај и без светло. Но, онаму каде што има осветлување, се прават максимални напори да се одржува редовно и да нема прекини. Последните случаи кога во изминатите денови во неколку наврати тунелот кај Катланово беше во темница по неколку часа во текот на еден ден, всушност, беа резултат на активностите што ги преземаше ЕВН на одредени водови, поради што имаше реонски исклучувања, што доведоа до прекин на струјата и во тунелот.

Според Благоја Тевдовски од Агенцијата за патишта, досега не се случило осветлените тунели да бидат во темница подолг период поради несоодветно одржување. „Никогаш не дошло до прекин на струјата поради штедење или нешто слично. Еднаш се случи да биде украдена трафостаницата, поради што имаше проблем одреден период, но тоа беше инцидентно и оттогаш не се случило ништо слично. Редовно се менуваат прегорените сијалици, светлечките ленти, се обележува сигнализацијата“, вели Тевдовски.

За одржување на тунелите се грижи јавното претпријатие „Македонија пат“. Во описот на работните задачи влегува редовното чистење на коловозите во тунелите, ед��аш годишно бојадисување на ѕидовите заради поголема јасност во внатрешноста на тунелот, електроодржување, под што се подразбира редовна замена на прегорените сијалици. Борче Саржовски, раководител на подружницата „Автопат“, појаснува дека осветлувањето на тунелите е направено во текот на нивната изградба и тоа според проекти за осветление, во кои точно се определени потребниот број сијалични места.

Електрификацијата на нашите тунели ги исполнува стандардите пропишани за ваква категорија тунели. Експертите се согласуваат дека тунелите, како впрочем, и самите патишта во државава, плачат за реконструкција. При една таква генералка, сигурно ќе биде направена модернизација и на тунелите, барем во оној дел во кој може да се интервенира, како што се нивните коловози, обележувањето, сигнализацијата и осветлувањето. Сепак, јасно е дека не може да се очекува комплетна промена на нивниот лик и воведување новитети, како што се поставување странични сијалици или вентилација. Такво нешто имаат само тунелите долги по неколку километри.