Текстот за Македонија најкоментиран во историјата на „Економист“

Лондон - Лондонскиот реномиран весник „Економист“ повторно се осврна на спорот околу името меѓу Македонија и Грција, по минатиот напис што беше најкоментиран текст во историјата на весникот.

Во анализата на спорот околу името весникот заклучува дека и доколку аргументите на Грција се вистински и таа е во право, Македонија треба да го задржи името, бидејќи тоа е придобивка за сите зошто ќе биде зајакната стабилноста во регионот.

„Грчкото тврдење (грубо кажано) е дека Македонија е име што и' припаѓа на античка Македонија и на северната грчка провинција што го носи тоа име. Комунистичка Југославија го даде тоа име на нејзината јужна република како провокација по грчката Граѓанска војна. Ако го прифати ’Македонија‘ како име за поранешната југословенска република, Грција би го признала приграбувањето на името од страна на комунистите и би станала подложна на територијални барања или дури тероризам. Таа тврдоглаво одбива да му дозволи на северниот сосед да продолжи на патот кон членство во Европската унија и НАТО се' додека не се помрдне од ставот во врска со името“, наведува весникот. „Економист“ оценува дека не држи ниту аргументот за опасен иредентизам. „Како релативно голема земја и членка на ЕУ и на НАТО, Грција не може да нуди ваков изговор во однос на нејзиниот мал северен сосед. Последните 20 години покажаа дека проширувањето на ЕУ и на НАТО е најдобар начин да се направи проблематичното соседство побезбедно“, се истакнува во текстот.

Авторот на написот поаѓа и од друга претпоставка, а тоа е дека се во право македонските, како што ги нарекува, најзакоравени протагонисти дека тие се наследници на античката цивилизација, додека Грција е етнонационалистички силеџија со фашистички тон што се противи на словенското малцинство на северот“.

Заклучокот што весникот го изведува од оваа анализа е дека: „ако властите од Скопје се во право, тогаш непризнавањето на нивното име е срамота. Ако не се право, дури и ако се будалести и провокативни, давањето на нивното посакувано име чини помалку отколку што тврди Грција, и има големи придобивки за сите, преку зајакната стабилност“. (МИА)