Струмички театар со „Роденден“ гостува во Црна Гора
Народниот театар „Антон Панов“ од Струмица вечерва гостува на Меѓународниот фестивал посветен на актерот во Никшиќ, Црна Гора. Ансамблот на струмичкиот театар пред црногорската публика ќе се претстави со „Роденден“ од Харолд Пинтер во режија на Крсто Јовановски. На фестивалот во Никшиќ учествуваат претстави од повеќе балкански и европски земји.
Следното гостување на струмичкиот театар е во Скопје. На сцената на Турскиот театар на 26 и 27 февруари, струмичани ќе се претстават со две изведби на претставата „Последниот ден на Мисирков“ од Јордан Плевнеш во режија на Дејан Пројковски.
Во текот на март и април Народниот театар „Антон Панов“ од Струмица е поканет да гостува во Радовиш, годинешниот град на културата. Во Радовиш, ансамблот на оваа куќа ќе се претстави со „Роденден“ и со монодрамата „Велика“ работена според романот „Пиреј“ од Петре М. Андреевски, во изведба на Зора Георгиева. (Л.М.) |
