Видеопрезентација во Центарот за култура во Струга
Во Арт-киното на Центарот за култура во Струга вечерва во 20 часот ќе биде прикажан видеозаписот на музичкиот ораториум „Страстите по Матеј“ на епископот Иларион Алфеев.
Ораториум е изведен од Чајковскиот симфониски оркестар, Хорот на Третјаковската галерија и познатите руски солисти, раководени од диригентската палка на светски познатиот маестро, Владимир Федосеев. Федосеев за делото на епископот Иларион ќе изјави: „Авторот на ова дело се свртил кон душите човечки, се свртил кон Вечната книга - Евангелието... тоа е музика што проникнува во душата на секој човек“. Епископот Иларион Алфеев е роден во Москва во 1966 година. Студирал виолина и композиција на Конзерваториумот „Чајковски“ во Москва и бил еден од најдобрите студенти во историјата на оваа институција, но ги прекинал студиите и се замонашил. Ја завршил Московската духовна семинарија, дипломирал и магистрирал на Теолошката академија во Москва, а докторирал филозофија на Оксфорд. Во 2001 е избран за епископ на Руската православна црква и нејзин претставник во европските институции во Брисел, а во 2003 година за епископ виенски и австриски. Автор е на повеќе од 600 публикации. (К.Б.) |
