Претходен број

Граѓанска иницијатива за итна изградба на спомен-куќата на Тоше

Се очекува кон крајот на октомври, конечно, да стартуваат градежните работи за изградба на објектот

Моника Талеска

КРУШЕВО - Над илјада граѓани од Крушево, Прилеп, Скопје, Битола и од други градови на Македонија вчера се потпишаа во книгите за поддршка на граѓанската иницијатива за интензивирање на работите и итна изградба на спомен-куќата на македонскиот хуманист и пејач - мегаѕвездата Тоше Проески.

„Имаме огромна поддршка од граѓаните. Само за четири и пол часа првиот ден на акцијата се собрани над илјада потписи во двете книги отворени во центарот на градот и кај гробот на Тоше, а акцијата ќе трае до 15 јуни. Тоше беше голем хуманист, човек кој несебично му помагаше на секого, тој беше амбасадор на македонската музика во светот, но, и покрај големите обврски, секогаш наоѓаше време за пријателите, за Крушево, за оние што ги сакаше. Тој му помагаше на секого и заслужува итно да биде изграден објектот што ќе биде негова спомен-куќа“, вели Методија Стојчески, негов другар и член на Иницијативниот одбор. Оваа граѓанска асоцијација е поддржана и од основното и средното училиште во Крушево, одбојкарскиот клуб „Синалко“, од многу граѓански здруженија и невладини организации.

„Револтирани сме поради тоа што и по осум месеци од трагичната смрт на Тоше не се презедоа конкретни мерки за изградба на спомен-куќата на место што е само стотина метри оддалечено од неговиот гроб на Гумење. Акцијата не е насочена против никого. Целта е институциите на државата да го разрешат проблемот со локацијата и мотелчето кое не работи повеќе од 20 години и колку што може побргу да почне изградбата. Имаме сознанија дека некој сака спомен-куќата да биде дислоцирана на друго место. Но, крушевчани нема да го дозволат тоа, зашто наша обврска е да ги спроведеме идеите на Тоше. На тоа место тој сакаше да го изгради своето студио, не успеа во таа идеја. За жал, се случи трагедијата, но тука ќе ја изградиме неговата спомен-куќа“, вели Никола Ќурчиевски од Иницијативниот одбор.

Градоначалничката Лефкија Гажоска, која е и член на Координативното тело за заштита на ликот и делото на Тоше Проески, вели дека се преземени сите мерки, но работите кочат кај сопственикот на т.н. мотелче, Петар Пановски.

„Сметам дека најбрзо што може Паноски треба да дојде во Крушево и заедно со претставниците од Министерството за култура да го реши овој проблем. Имајќи го предвид руинираниот објект на Гумење, сметам дека сумата од 105.000 евра што ја побарал Паноски е превисока“, вели Гажоска.

И покрај инсистирањето, вчера не успеавме да исконтактираме со Пановски. Од Историскиот музеј, пак, очекуваат дека до крајот на месецов со вонсудска спогодба со Пановски проблемот ќе биде решен.

„Објектот е дивоградба. Пановски е сопственик на две, а Историскиот музеј на една идеална третина од објектот. Но, за изградба на спомен-куќата треба да се сруши сегашната дивоградба, па на државно земјиште да започнат градежните работи за реализација на главниот проект. Бидејќи во актуелниот судски спор тој е тужител, му понудивме да си го повлече објектот, а со вонсудска спогодба ќе биде обесштетен. Според судското вештачење, цената на објектот е трипати пониска од 105-те илјади евра што ги бара Пановски за возврат“, вели Калиопи Бојчиноска, директорка на Историскиот музеј.

Таа информира дека следен чекор ќе биде изработката на главниот проект за кон крајот на октомври конечно да стартуваат градежните работи за изградба на спомен-куќата на Тоше на Гумење.