Вардар се излеа кај Раотинце

ТЕТОВО - Реката Вардар вчера се излеа кај тетовското село Раотинце и навлезе во десетина куќи и стопански дворови. Поплавени се и околу 200 хектари веќе засеани земјоделски површини. Вардар се излеа и во атарите на соседните села Копанце и Туденце. Според Кирко Масевски, претседател на МЗ „Раотинце“, причина за излевањето не се само дождовите, туку и испуштањето води од Мавровско Езеро. „Повеќе пати контактиравме со Дирекцијата за заштита и спасување и со Управата на ‘Мавровски електрани‘. Баравме да сопре испуштањето вода од Мавровско Езеро, но сугестиите не беа прифатени. Оттаму кажаа дека, наводно, била загрозена браната и дека треба да остварат производство на 1,3 милиони киловат-часови електрична енергија. Колку што е добивката од струјата, сега уште поголема е штетата, а последиците паѓаат на наш грб“, се пожали Масевски. (Г.Е.)