Државата бара закупци за плажи во Струга и во Дојран

Државата бара закупци за 30 плажи во Дојран и во Струга. Објавата на Министерството за транспорт и врски е распишана вчера, а станува збор за краткотраен закуп на 18 плажи на Дојранското Езеро и на 12 на Охридското Езеро во Општина Струга. Почетната цена по квадратен метар во Дојран е еден денар, а за плажите во Струга 55 денари, пресметани како годишна закупнина.

„Активностите се во насока на уредување на плажите на Охридското Езеро во Струга и Дојранското Езеро, согласно со современите туристички стандарди за да може на почетокот на летната сезона да бидат подготвени сите предуслови за пречек на туристите“, соопшти Министерството за транспорт и врски.

Рокот за доставување на пријавите за учество на јавните наддавање трае до 3 мај, а наддавањата ќе се одржат на 19 и на 20 мај во Министерството за транспорт. За користење на плажата закупецот е должен да овозможи слободен влез за посетителите, т.е да не се наплаќа надоместок за плажата, пред почнување на дејноста да набави фискална каса, да достави доказ за лица во работен однос и соодветни дозволи. Меѓу другото, има обврска постојната и планираната песочна површина да ја уреди во градежна рамка, да ја изнивелира и да ја попесочи со автохтон песок, а зеленилото да го зачува и да го уреди. 

Сервисниот пункт на закупецот треба да содржи минимум два туша и санитарни јазли, соблекувални, остава за чадори, лежалки и други реквизити. Задолжително е закупецот да обезбеди служба за спасување, да постави информативни паноа, безжичен Интернет и други погодности за забавен престој“, се вели во соопштението. (МИА)