Груевски вети економска зона во Тетово

ТЕТОВО - Економска зона во Тетово вети лидерот на ВМРО-ДПМНЕ и премиер Никола Груевски, на завчерашната трибина. Пред преполната сала во Центарот за култура, Груевски со десетина министри, пратеници, директори на јавни претпријатија, се пофали за досега сработеното и одговараше на прашања од граѓаните. Во настапот на Груевски немаше ниту збор критика за работата на Владата или признание за некакви промашувања.

Инфраструктурата во зоната, која ќе биде оддалечена од Тетово седум километри, на патот кон Желино, според Груевски, ќе почнела да се гради летово, во почетокот на јули. Работите се одвивале бавно, бидејќи барањето за денационализација на земјата ги успорило активностите.

Во првиот дел од трибината, Никола Груевски направи пресек на постигнувањата во државата, почнувајќи од економијата, па се' до спортот. На тетовци им се пофали за порастот на домашниот бруто-производ во 2007 и во 2008 година за 5,9, односно 5 отсто, за странски инвестиции од 507, односно 430 милиони евра во тие две години, нагласувајќи дека според меѓународни финансиски институции по севкупниот раст, Македонија од 96 се искачила на 30 место. (Г.Е.)