Бабунски ги одбра „малите“ за Мали

Селекторот на нашата млада репрезентација, Бобан Бабунски, го објави списокот за пријателскиот меч против репрезентацијата на Мали на 16 ноември (18 ч.) на националната арена „Филип Втори“.

Повикани се 18 играчи од кои две третини се интернационалци. „Австријците“ Гачевски (Капфенберг) и Стојановиќ (ФК Лустенау) ќе конкурираат за место меѓу стативите, во дефанзивата Бабунски смета на К. Ристевски (Елбасани), Брдаревски (Пелистер), С. Ристевски (Парма), Мициновиќ (Скопје), Митревски (Напредок), Богдановиќ (Металург) и Урдинов (Рода), во средниот ред се повикани Дурански (Славија Прага), Јовановски (Тетекс), Станков (Рода), Спировски (Борац Чачак) и Хасани (Шкендија), во комбинација за нападот се Станков (Рода), Несторовски (Словачко), Фазли (Херенвен) и Алтипармаковски (Ксанти).

Собирот на репрезентативците е закажан за 14 ноември, а подготовките за мечот со Мали ќе се реализираат на игралиштето на АМС во општина Илинден. (С.Д.)