ФФМ
Ништо од договор со Аугенталер
Најсериозниот кандидат за селектор на македонската фудбалска репрезентација Клаус Аугенталер по дводневните разговори со челниците на Фудбалската федерација на Македонија не ја прифати функцијата од „лични причини“.
„Со Аугенталер два дена водевме навистина коректни разговори, ги разгледавме сите наши и негови услови и кога се чинеше дека ќе најдеме заеднички јазик, тој не' извести дека се откажува од кандидатурата, но со надеж дека во иднина може да дојде до заемна соработка. Откажувањето, како што рече, е од лични причини“, не' информира генералниот секретар на ФФМ, Игор Климпер, по враќањето во Скопје вчера од Минхен, каде што го придружуваше претседателот Харалампие Хаџи-Ристески на разговорите со Германецот. Исходот ��е се разгледува на следната седница на Управниот одбор на Федерацијата.
По отпаѓањето на Аугенталер кандидати за местото на Мирсад Јонуз остануваат Чедомир Јаневски, Велшанецот Џон Тошак, Словенецот Бојан Прашникар, Израелецот Ели Гутман и Хрватот Мирослав Ќиро Блажевиќ. Но, во трката за селектор како поевтина опција се наметнуваат и три домашни имиња, пред се' Ѓоре Јовановски, кој еднаш веќе ја одби понудата, но се' уште е без ангажман, потоа сегашниот тренер на Вардар, Илчо Ѓорѓиоски, како и селекторот на младата репрезентација Бобан Бабунски. (М.М.) |
