На Онкологија се делат вишоци, а за апаратите не се грижи никој
Не се знае како се делат парите што ги заработила клиниката од приватни пациенти
Јасмина Јовановска
На Клиниката за онкологија и радиотерапија им се делат вишоци на вработените од парите собрани од лекување приватни пациенти, а повеќе од една година никој не се грижи за одржување на апаратот за зрачење и на другата опрема што чинат над 10 милиони евра.
Парите кои во касата на клиниката влегле по основа на приватно лекување не се знае на кои вработени им се делат, според кои критериуми и по колку, се жалат вработените на Клиниката за онкологија, кои додаваат дека досега во четири наврати се делеле екстра-пари надвор од платата. Неофицијално се зборува дека оваа клиника месечно собира околу 60.000 вера од приватни пациенти, кои најчесто од Косово доаѓаат за зрачење или за цитостатичка терапија во Скопје, што е прилично голема сума пари. А овие екстразаработени пари, место да се употребат за одржување на акцелераторот, како што неофицијално дознаваме дека било сугерирано од Фондот за здравствено осигурување, зашто во клиничкиот буџет немало пари за одржување, раководството на клиниката, сепак, одлучило да им ги подели на вработените. Тоа што некој од апаратите може да откаже, велат на клиниката, не го интересира никого.
„Да се пари од дополнителна дејност, нормално е да ги земат само оние лекари и медицински сестри што работеле екстра од редовното време. Но, овие пари се од приватно лекувани пациенти кои се лекуваат во редовното работно време и им следуваат на сите вработени“, реагираат одредени лекари од Онкологија. Тие обвинуваат дека досега четири пати се поделени парите што ги наплатила клиниката од приватни пациенти, но никој не знае кој ги добил тие средства, според кои критериуми и по колку. „Тоа се пари на клиниката и треба јавно да се истакне, а не еднаш да добијат едни, следниот пат други лекари и медицински сестри и пак да не се знае ништо“, објаснуваат дел од незадоволните вработени и прашуваат дали ако откаже некој апарат, за поправка ќе се земат пари само од вработените на кои им се поделени вишоците или товарот ќе го понесе целата клиника.
Од Фондот за здравствено осигурување, пак, велат дека откако клиниките станаа посебни субјекти, не можат да се мешаат во распределбата на парите. Во Фондот не се сеќаваат дека на Клиниката за онкологија и' сугерирале парите од приватни пациенти да се пренаменат за одржување на опремата. „И фондовската контрола што беше направена на клиниката не покажа некои неправилности околу распределбата на парите“, велат во Фондот за здравствено осигурување, од каде што, сепак, за делењето на вишоците не' упатија на директорката на Клиниката за онкологија, д-р Симонида Црвенкова.
За поплаките околу поделбата на вишоците објаснување не добивме од д-р Црвенкова, зашто од директорскиот кабинет не' информираа дека службено е отсутна во Фондот за здравствено осигурување. Според она што го презентирала д-р Црвенкова во Фондот за одржувањето на опремата, на вработените им биле поделени само 50 отсто од екстразаработените пари од приватни пациенти, а дека другата половина биле оставени за одржување на опремата, за што бил распишан и тендер.
А тендерот кој д-р Црвенкова го најави уште пред околу една година, кога ја поставија за в.д. директор, никако да заврши и да се избере најповолната фирма-сервисер. |
