Претходен број

Портрет

Човекот од сенка во спикерскиот кабинет

Трајко Велјановски, новиот претседател на Собранието, никогаш не бил во првиот ешалон на ВМРО-ДПМНЕ

Оливера Војновска

Адвокатот Трајко Велјановски и специјален советник за правни работи на премиерот и лидер на ВМРО-ДПМНЕ, Никола Груевски, од саботата е новиот станар во Кабинетот на претседателот на Собранието. Неговиот избор за парламентарен спикер не е изненадување. Напротив, иако апетити за функцијата втора по важност во државата пројавија и други вмровци, се очекуваше дека Велјановски ќе биде новиот шеф на парламентот.

Тој со своите 46 години се вброи меѓу помладите претседатели на Собранието кои се сменија во овие 18 години. Неговите претходници беа значително повозрасни - Стојан Андов, Тито Петковски, Саво Климовски, освен Никола Поповски, кој стана претседател на Собранието со 40 години.

Велјановски е искусен правник и не е непознат во политичкиот живот. Тој досега не бил во првиот партиски ешалон, но, сепак, беше доволно блиску до центрите што имаат влијание и ја кројат политиката во ВМРО-ДПМНЕ. Велјановски веројатно добро се чувствуваше во партиската сенка, секогаш внимателен да биде на пристојна дистанца за да не „изгори“. Важи за луѓето во кои неговиот партиски шеф има доверба. Во ВМРО-ДПМНЕ е од 1993 година, а во времето на судирот меѓу Љупчо Георгиевски и Никола Груевски, тој застана на страната на Груевски.

Велјановски подолго време се споменуваше како парламентарен спикер, но, исто така, одамна се става и во комбинациите за министер за правда. Некои тврдат дека таа функција ја посакувал многу повеќе, само некако му бега од раце.

Ова му е втор пратенички мандат, а беше и на други високи државни функции: потсекретар, заменик-министер во Министерството за правда и државен советник во Владата. Јавноста го памети и како член на ДИК за претседателските избори во 1999 година, кога жестоко се конфронтираше со Владо Бучковски и со Борис Кондарко од СДСМ. Од 2002 до 2003 година беше член на Комисијата за претставки и предлози на претседателот на Македонија, во времето на покојниот Борис Трајковски.

Неговите партиски колеги во парламентот, особено оние од таканареченото градско крило, се убедени дека „Трајко е вистинскиот човек за оваа функција“. Веруваат дека има политичко искуство и капацитет да се справува со одговорноста.

Неговиот избор помина без реакција од опозицијата, која се воздржа од дискусии на собраниската седница. За разлика од изборот на Љубиша Георгиевски пред две години, спрема кого беа критички настроени, читаа и негови колумни за да го потсетат со каква омраза пишувал за СДСМ.

Сепак, во неформалните разговори не изостанаа коментарите. „Трајко е премногу крут, конфликтен и, наместо да смирува, тој ќе подгрева тензични ситуации“, скептични се опозиционерите. Одредена доза воздржаност постои и меѓу некои колеги од портокаловата коалиција. „Ќе видиме како ќе биде. Трајко знае да биде прилично остар, работите ги дочекува на нож“, велат тие.

Велјановски има на располагање четири години за да ги демантира скептичните во парламентот и да ги потврди надежите на сопартијците, како и на пратениците од ДУИ кои први му искажаа поддршка.

Во првиот настап пред Собранието, Велјановски искажа решеност да направи баланс меѓу политичките неистомисленици во парламентот. На пратениците им вети дека законодавниот дом нема да има инфериорна позиција во однос на Владата и ќе „стане вистински храм на демократијата“. Своевремено, точно пред десет години, иста амбиција имаше и ексспикерот Саво Климовски, но не успеа да ја реализира.