Обновени армиските објекти во Еребино

ТЕТОВО - „За реконструкција на армиските објекти годинава вложувам�� 110 милиони денари со што создаваме услови според НАТО-стандардите. За поправки во воениот комплекс ‘Еребино‘ кај Тетово и касарната во Кичево се наменети половина од средствата. Истовремено, се интервенира и на воените објекти на Попова Шапка, Велес“... Ова вчера го изјави министерот за одбрана Зоран Коњано��ски при престојот во „Еребино“.

На воените објекти во „Еребино“ се работело на покривот, фасадата, заменети се прозорците и вратите, обновени се кујната, трпезаријата и санитарните јазли. Овие зафати чинат околу 5 милиони денари. Во Кичево целосно се реновираат два објекта каде што ќе бидат сместени војниците од втората механизирана пешадиска бригада по нејзината дислокација од Охрид во Кичево.

Министерот за одбрана најави обновување и на касарната на Попова Шапка. „Таму работиме на создавање регионален центар за обука во зимски услови. Тендерската постапка е завршена, фирмата е одбрана, а работите почнуваат наскоро“, појасни министерот за одбрана. (Г.Е.)