Од септември нова телевизија на албански јазик

Миркица Поповиќ

Билбордите во Чаир и во Бутел најавуваат дека наскоро ќе се појави новата телевизија АЛБ ТВ. Телевизијата ќе биде на албански јазик, а засега емитува само експериментална програма. Редовната програма на телевизијата е планирано да започне од септември. Сопственик на телевизијата е познат струшки бизнисмен во сферата на градежништвото, Менди Ќира, кој за прв пат влегува во медиумски води.

Претседателот на Советот за радиодифузија, Зоран Стефановски, изјави за „Утрински весник“ дека АЛБ ТВ на конкурс добила дозвола за сателитска телевизија, со која во рок од една година треба да почне со емитување на програмата. Откако ќе започне со официјална програмска шема, Советот е должен да ги провери студијата за да се увери дека се задоволени критериумите за работа неопходни за задржување на дозволата.

Уредничкиот тим го сочинуваат Бардил Заими, главен уредник, кој има големо новинарско искуство во печатените медиуми, Сефер Тахири, заменик- главен уредник, кој доаѓа од уредничка позиција од Алсат-М, и Арта Тахири, која досега беше водителка на емисијата „Еврофокус“ и главна презентерка на вестите на Алсат-М.

Официјални претставници од телевизијата велат дека АЛБ ТВ ќе го има во фокусот и ќе му се обраќа првенствено на албанското население, разгледувајќи ги и нивните секојдневни проблеми. Меѓутоа, тоа не значи дека ќе бидат запоставени економските, политичките и општествените проблеми со кои се соочуваат граѓаните во Македонија.

„Телевизијата е замислена како отворен форум за сите политички и општествени групи и со тоа сакаме да покажеме дека ќе бидеме медиум за развој на информацискиот систем во државата, но и за развој на општествената, политичката и економската дебата во вистинска смисла преку соочување различни мислења и ставови од различни области“, посочуваат од АЛБ ТВ.

Една од главните причини за формирање на телевизијата е и збогатување на информацискиот простор со содржини на албански јазик, бидејќи, како што истакнуваат официјални претставници од телевизијата, во македонскиот телевизиски етер со само една албанска национална телевизија Алсат-М, има потреба од дополнителни квалитетни програми на албански кои ќе ги тангираат животот и проблемите претежно на албанското население. Најавуваат дека ќе бидат конкурентни на пазарот преку нов програмски концепт на политички, образовни и забавни програми, поголем број дебати и разновидна програмска шема наменета за сите општествени групи од различни структури.

Новинарскиот и продукциски тим е во фаза на формирање, а од телевизијата истакнуваат дека е шанса и за истакнати новинари, но и за вработување млади, штотуку дипломирани кадри. Политиката за вработување не дискриминира по национална припадност, но е неопходно о��лично познавање на албанскиот јазик.

Главниот уредник на досегашната единствена национална албанска телевизија Алсат, Мухамед Зекири, истакна дека не ја смета АЛБ ТВ за конкуренција, потенцирајќи дека нема концесија за национална, туку за сателитска телевизија.